Zacarías 3 - Bible in Tzotzil de Chenalhó with Deuterocanon

Li Zacariase laj yil ta xch'ulel li banquilal pale Josuee

¹ Li Diose laj yac'bun quil ta jch'ulel li banquilal pale Josuee te va'al ta stojol yaj'almantal Dios; jech ec li banquilal pucuje te va'al ta sbats'ic'ob li Josuee, yu'un ta stic'be smul.

² Li yaj'almantal Diose jech laj yalbe li banquilal pucuje: “¡Banquilal pucuj, ta xutot li Muc'ul Diose! ¡Li Muc'ul Dios ti ja' st'ujoj li Jerusalene ja' ta xutot! Li vinic li'i, ja' jech chac c'u cha'al ac'al ti lec tsanal chich' loq'uesele”, xut.

³ Li Josué te va'al ta stojol j'almantale, toj ic' li sc'u' slapoje.

⁴ Li j'almantale lic spas ta mantal li yajcoltaubbailtac te va'ajtique, jech laj yalbe: “Loc'beic li sc'u' toj iq'ue”, xut. Li j'almantale jech laj yalbe li Josuee: “A'yo ava'ay, li'i ja' senyail ti laj xa jloq'uesbot amule; ja' xa ta xcac'bot alap li c'u'il sventa q'uine”, xut.

⁵ Li j'almantale jech laj yal noxtoc: “Ac'beic lec sac xpix sjol”, xut. Jech lic yac'beic xpix sjol, xchi'uc la slapbeic sc'u' sventa q'uin. Li j'almantale te va'al o ec.

⁶ Li yaj'almantal Diose jech laj yalbe li Josuee:

⁷ “Li Muc'ul Dios ti tspas ta mantal scotol te ta vinajele jech chastaq'uiot: ‘Me ja' te chaxanov o ta be cu'une, me chach'un li chanubtaseletic cu'une, vo'ot te chachabi o li ch'ulna cu'une xchi'uc li yamaq'uiltaque. Jech noxtoc ta xcac'bot avabtel ta stojol li j'almantaletic li'i.

⁸ A'yo ava'ay banquilal pale Josué, a'yo ava'ay xchi'uc li achi'iltac ta paleal ti co'ol te chotoloxuc achi'uque, yu'un li vo'oxuque senyailoxuc no'ox, yu'un ta to xquic' tal li cajtunel, ti Ach' Sq'uelum xi sbie.

⁹ Josué, li' ta asat laj cac' jbej ton. Li ton le'e ja' no'ox stuc oy vucbej sat; vu'un jtuc oy c'usi te ta jts'iba. Ts'acal to, ta jun no'ox c'ac'al ta jch'aybe smul li banamil li'i.

¹⁰ C'alal me la sta li sc'ac'alil le'e, talbat avic' abaic achi'uc achi'ilic ta sventa chacux avo'ntonic ta yolon ts'usubtic, xchi'uc ta yolon higotic avu'unic’, xi li Muc'ul Dios ti tspas ta mantal scotol te ta vinajele”, xi li yaj'almantal Diose.