Zacarías 2 - Bible in Tzotzil de Chenalhó with Deuterocanon

Li Zacariase laj yil ta xch'ulel jun vinic yich'oj xch'ojon sventa oy c'usi tsbis

¹ C'alal la jtoy jsat yan veltae, laj quil jun vinic stsacoj ta sc'ob jc'om ch'ojon sventa oy c'usi tsbis.

² Jech laj calbe: “¿Bu chabat?”, xcut. Jech la stac'bun: “Yu'un chbat jbis c'u sjamalil, xchi'uc c'u snatil li lum Jerusalene”, xiyutun.

³ Laj quil iloc' batel li j'almantal ti la jchi'in ta lo'il ta ba'yuque; te ital nupatuc ta be yu'un yan j'almantal,

⁴ jech i'albat: “Batan ta anil, bat nutso li vinic le' yich'oj jc'om xch'ojon sventa oy c'usi tsbise, jech xavalbe: ‘Li Jerusalene mu'yuc xa ta xich' pasbel scoraltonal, yu'un chlic nacluc epal cristianoetic te, xchi'uc chlic ayinuc ep sts'unub yovolic.

⁵ Ja' yu'un jech chal li Muc'ul Diose: Vu'un coraltonun chic'ot, tsanalun jech chac c'u cha'al c'oc' ta spat xocon li Jerusalene, xchi'uc te ta xcac' ta ilel jxojobal’, uto”, xut.

Li Muc'ul Diose ta scolta li steclumale

⁶ Jech chal li Muc'ul Diose: “Vo'oxuc ti la jpucoxuc batel ta xchanjotal xchiquin banamile, jatovanic loq'uel te ta norte.

⁷ Vo'oxuc ti te to'ox nacaloxuc ta Sione, jatovanic loq'uel te ta stojol li babiloniaetique”, xi.

^8-9 Li Muc'ul Dios ti tspas ta mantal scotol te ta vinajele la stacun tal ta sventa tal calbe c'usi chc'ot ta pasel ta stojolic li muc'tic lum ti la spojboxuc c'usitic oy avu'unique, jech chal li Muc'ul Diose: “Boch'ouc no'ox ta xuts'inta li jteclumale, ja' ta xuts'intabun o li yuninal jsate. Ja' yu'un vu'un jtuc ta xcac' jc'ob ta stojol li jujun banamil le'e, jech smozo xa no'ox stuquic ta xpojbat c'usitic oy yu'unic”, xi. Xchi'uc jech chana'ic o ti ja' la stacun tal li Muc'ul Dios ti tspas ta mantal scotol te ta vinajele.

¹⁰ Li Muc'ul Diose jech chal: “Jnaclumetic ta Sión, q'uejinanic, cuxetuc no'ox avo'ntonic, yu'un te chital, te chinaqui ta atojolic”, xi.

¹¹ Me la sta li sc'ac'alil le'e, ep cristianoetic ta yantic banamil ta stsob sbaic tal ta stojol li Muc'ul Diose. Jech chal: “Ja' jteclumal chc'otic o, te chinaqui o ta stojolic”, xi. Jech chana'ic o ti ja' la stacun tal ta atojol li Muc'ul Dios ti tspas ta mantal scotol te ta vinajele.

¹² Li Muc'ul Diose ta xac' nacluc yan velta ta ch'ul banamil li Judae; ja' yu'un chc'ot o. Jech noxtoc li lum Jerusalene ja' t'ujbil lum chc'ot o.

¹³ Ac'o ch'anxiuc scotol cristianoetic ta stojol li Muc'ul Diose, yu'un totsem xa tal ti bu xch'ul naclebe.