Zacarías 14 - Bible in Tzotzil de Chenalhó with Deuterocanon

Tsta yorail tspas mantal li Diose

¹ Lum Jerusalén, ta xa xtal sc'ac'alil li Muc'ul Diose; ja' yorail te chich' puquel ta atojol li c'usitic apojoje.

² Ta sc'ac'alil le'e, li Muc'ul Diose ta stsob tal scotol cristianoetic ta yantic banamil sventa chtal stsaquic ta c'op li Jerusalene. Ta x'och ta c'abal li lume. Ta xich'ic pojbel scotol li c'usitic oy ta snaique; ta xich'ic uts'intael li antsetic yu'unique; ta xich'ic chuquel batel ta yan banamil j'o'loluc li jnaclumetique. Ti c'u to yepal chcomique li' chnaquiic o.

³ Ts'acal to li Muc'ul Diose chlic stsac ta c'op li lumetic le'e; ja' jech ta spasbe jech chac c'u cha'al tspas ono'oxe.

⁴ Yan te ta vits olivatic ta yeloval Jerusalén ta stuq'uil sloq'ueb c'ac'ale ta stec'an lec yacan. Li vits olivatique ta svoc' sba ta o'lol ta stuq'uil sloq'ueb c'ac'al xchi'uc ta stuq'uil smaleb c'ac'al. Jvoc' chbat ta stuq'uil norte; jvoc' chbat ta stuq'uil sur. Lec jamal chcom.

⁵ Ja' te chajatovic batel ta stenlejaltic ti cacal ta o'lol yu'un li vitsetique, yu'un li stenlejaltique chc'ot c'alal to ta Azal. Ja' jech chc'ot ta pasel jech chac c'u cha'al lajatovic yu'un niquel ta yorail c'alal tiq'uil ta ajvalilal ta Judá li Usiase. Yu'un li Muc'ul Dios cu'une ta xchi'in tal li boch'otic te oyic ta vinajele.

⁶ Me la sta sc'ac'alil le'e, mu'yuc xa chq'uep, mu'yuc xa chbut'.

⁷ Le'e ja' no'ox stuc jun c'ac'al yotquinoj stuc li Muc'ul Diose, yu'un mu'yuc c'ac'altic, mu'yuc ac'ubaltic. C'alal bat c'ac'ale, te staoj yav sac osil o.

⁸ Jech noxtoc, ta sc'ac'alil le'e ta xlic t'omanuc nio'etic li' ta Jerusalén; te oy o ta yorail scomil c'ac'al xchi'uc ta snatil c'ac'al. J'o'lol chbat ta Nab Muerto; j'o'lol chbat ta Nab Mediterráneo.

⁹ Li Muc'ul Diose ja' Ajvalil chc'ot ta scotol banamil. Chlic yich' otquinel ti ja' no'ox stuc Ajvalil oe, ti mu'yuc boch'o yan jech sbie.

¹⁰ Scotol li banamil li'i ta xlic pasuc ta stenlejaltic, chlic batel ta Geba c'alal to ta Rimón ta stuq'uil sur yu'un li Jerusalene. Li Jerusalene ta to xlic toyuc, ta x'ayin lec yajvaltac. Te chlic naquiicuc batel ta ti'coralton Benjamín c'alal to ti bu Chiquin Coralton sbi te ti bu Poco' ti'coralton to'ox sbie, xchi'uc te chlic batel noxtoc ta toyol q'uelub osil Hananeel c'alal to ta spits'ubiltac ya'lel ts'usub yu'un ajvalil.

¹¹ Jech jun yo'nton te ta xnaquiic o; mu'yuc xa chich' ilbel sbatel yan velta li Jerusalene, jun yo'ntonic o li yajvaltaque.

¹² Scotol li lumetic ti la scontrainic li Jerusalene ta x'ac'bat stojic yu'un li Muc'ul Diose. Li stojol chich'ique ja' jech chac li'i: Ta sc'a'esbe sbec'talic ti c'alal xva'lajetic toe; te chlic c'a'anuc ta yut li sbec' satique, xchi'uc te chlic uluc ta yut yeic li yoq'uique.

¹³ Ta sc'ac'alil le'e, ta xtacbatic tal muc'ta xi'el yu'un li Muc'ul Diose. Ta jujuntal ta xlic stsac sbaic, ta xlic yac'be sba stuquic.

¹⁴ Li jnaclumetic ta scotol Judae ta stic' sbaic ta spojel ec li Jerusalene, jech ta stsobbeic ep sc'ulejal li yantic banamil te sts'aquinoj sba xchi'uque. Ja' ta xich'ic li saquil taq'uin, li c'anal taq'uin, xchi'uc li c'u'il pac'aletique; bats'i ep tsbusanic ta ich'el comel.

¹⁵ Ti c'u x'elan stojol smul chich'ic li cristianoetique ja' jech chich'ic ec li ca'etic, li machuetic, li camelloetic, li buroetic, xchi'uc scotol li sts'unub yovolic te ta scarpanaique.

¹⁶ Scotol ti c'u yepal cuxul chcomic ta jujun banamil ti ay scontrainic li Jerusalene, jujun jabil chbat yich'ic ta muc' li Ajvalile, ja' li Muc'ul Diose; chbat spasic q'uin sventa Yaxnaetic.

¹⁷ Li boch'o mu'yuc chbatic ta Jerusalén chbat yich'ic ta muc' li Ajvalile, ja' li Muc'ul Dios ti tspas ta mantal scotol te ta vinajele, mu'yuc ta xtal vo' ta yosilalic.

¹⁸ Me ja' muc xtal jchopuc sts'unubal li cristianoetic ta Egiptoe mu'yuc ta xac' vo' ta yosilalic. Ja' no'ox ta x'ac'bat stoj smulic yu'un Muc'ul Dios jech chac c'u cha'al chac'be li cristianoetic ti mu xbat spasic q'uin sventa Yaxnaetique.

¹⁹ Ja' jech stojol smul chich'ic li egiptoetique xchi'uc li yantic banamil ti mu xbat spasic q'uin sventa Yaxnaetique.

²⁰ Ta sc'ac'alil le'e, c'alal ta scampanail snuc' ca'etic jech chich' ts'ibael: “Ts'u'iltasbil sventa Muc'ul Dios”, xi chich' ts'ibael. Li binetic ta ch'ulna yu'un Muc'ul Diose ja' jech chc'ot jech chac c'u cha'al li muc'tic taza te ta scajleb smoton Diose.

²¹ Scotol li binetic ta lum xchi'uc ta Judae ts'u'iltasbil chcom ta sventa li Muc'ul Dios ti tspas ta mantal scotol te ta vinajele. Li boch'o te chbat smilic matanale ja' ta stunesic; ja' te ta spanbeic li sbec'tal matanal chaq'uic ta stojol Diose. Ta sc'ac'alil le'e, mu'yuc xa boch'o ta xchonolaj, ta xmanulaj te ta ch'ulna yu'un li Muc'ul Dios ti tspas ta mantal scotol te ta vinajele.