Zacarías 13 - Bible in Tzotzil de Chenalhó with Deuterocanon

¹ “Ta sc'ac'alil le'e ta xt'om jun nio' te ta stojol smomnich'nab David, xchi'uc ta stojol li jnaclumetic ta Jerusalene; ja' sventa spocubil smulic xchi'uc sbolilic.

² Ta sc'ac'alil le'e ta jloq'uesbe scotol li c'usitic scuyoj ta sdiosic ta scotol yosilalique, jech mu'yuc xa boch'o tsna' o. Jech noxtoc li j'alc'opetic yu'unic xchi'uc li pucuj ti tsoquesvane ta jip loq'uel ta yosilalic.

³ “Me oy to boch'o chal c'usi ch-ac'bat sna' yu'un Diose, me jech chalbe li stot sme'e: ‘¡Li vo'ote ta xacham, yu'un cha'epalc'opoj ta sventa li Muc'ul Diose!’, me xute, stot sme' xa no'ox ta x'abulaj yu'un ta sventa ti tscuy sba ta j'alc'ope.

⁴ Ta sc'ac'alil le'e yalem ta q'uexlal chcomic li j'alc'opetic ti chalic c'usi ch-ac'bat sna' yu'un Dios, xchi'uc li c'usi ch-ac'bat yil ta xch'ulelic scuyojique. Jech mu'yuc xa ta slapic li natil c'u'il ti oy stsotsil sventa chlo'lavanic oe.

⁵ Jech chlic yalic: ‘Muc j'alc'opucun, jloc banamilun no'ox. Ta jbic'tal ono'ox j'abtelun tal ta banamil’, xiic.

⁶ Me jech ta xjac'batique: ‘¿Pero c'u yu'un oy ep atuch'emal cha'e?’, me x'utatique, jech ta xtac'ovic: ‘Ja' te lituch' tal ta sna li boch'o lec jc'opan jba jchi'uque’, xiic”, xi li Diose.

Laj yich' milel jchabichij yu'un Muc'ul Dios

⁷ Jech chal li Muc'ul Dios ti tspas ta mantal scotol te ta vinajele: “Espada, lican, bat ac'bo ya'ay li jchabichij cu'une; bat contraino li vinic ti co'ol cabtel jchi'uque. Bat milo li jchabichije, te ac'o spuc sbaic batel li chijetique. Vu'un ta jcontrain, ta xcac' jc'ob ta stojol li ch'ium chijetique.

⁸ Li jnaclumetic li' ta avosilalique ech'em ta o'lol ta xchamic; ja' jutuc xa no'ox li boch'o cuxul chcomique.

⁹ Li boch'o cuxul to chcomique ta jtic' ta c'oc'. Ta xcunijes jech chac c'u cha'al saquil taq'uin; ta jchic'be loq'uel yic'ubal ta c'oc' jech chac c'u cha'al chich' lecubtasel c'anal taq'uin. Ta xlic sc'anbicun vocol ta jtojol, jech ta xca'ibe sc'opic ec. Jech chcalbeic: ‘Vo'oxuc jteclumaloxuc’, xcut. Jech chiyalbicun ec: ‘Vo'ot Muc'ul Diosot cu'uncutic’, xiic”, xi li Diose.