Zacarías 12 - Bible in Tzotzil de Chenalhó with Deuterocanon

Ta to xlic ach'ubuc yan velta li Jerusalene

¹ Li Muc'ul Diose laj yal c'usi chc'ot ta pasel ta stojol li Israele. Li Muc'ul Dios ti ja' la xlich'an li vinajele, ti ja' la snacan li banamile, ti ja' laj yac'be xch'ulel li cristianoe, jech chal:

² “A'yo ava'yic, li Jerusalene ta xcac' c'otuc jech chac c'u cha'al jbis pox, yu'un ac'o vovijuc sjolic yu'un li yantic banamil sts'aquinojan sba xchi'uque. Jech chtal scontrainic li Judae, xchi'uc chtal setuic li Jerusalene.

³ C'alal me la sta sc'ac'alil le'e, scotol lumetic chtal scontrainic li Jerusalene. Pero ja' jech ta xc'ot cu'un jech chac c'u cha'al jbej alal ton ta stojol li yantic banamile. Li boch'o tsc'an ta spete, te net'el ta xc'ot o.

⁴ Ta sc'ac'alil le'e, vu'un ta jtacbe tal muc'ta xi'el li ca'etique, xchi'uc ta jvovijesbe sjolic li soldadoetic cajajtic ta ca'e. Li smomnich'nab Judae ta xcac' lec jsat ta stojolic; yan li ca'etic yu'un yantic banamile ta jtu'pbe satic.

⁵ Li banquilaletic ta Judae jech chlic yal ta yo'ntonic: ‘Li jnaclumetic ta Jerusalene ja' ac'bil stsatsalic yu'un li Muc'ul Dios yu'unic ti tspas ta mantal scotol te ta vinajele’, xiic.

⁶ Li banquilaletic ta Judae ja' jech ta xc'otic cu'un jech chac c'u cha'al yac'alil c'oc' ti chac-uban lec yu'un si'ile, xchi'uc ja' jech chc'ot jech chac c'u cha'al toj ti c'alal tsanem ta o'lol taqui te'el trigoe. Yu'un ja' ta xchic' batel ta bats'ic'ob, ta ts'etc'ob scotol lumetic li' ta spat xocon Jerusalene. Li jnaclumetic ta Jerusalene ja' jun yo'nton chlic naquiicuc ta slumalic.

⁷ “Vu'un li Muc'ul Diosune ja' ba'yuc ta jcolta li smomnich'nab Judae, yu'un jech mu xlic stoy sbaic ta stojol smomnich'nab Judá li smomnich'nab Davide xchi'uc li jnaclumetic ta Jerusalene.

⁸ C'alal me la sta sc'ac'alil le'e, ta jcolta li jnaclumetic ta Jerusalene. Li boch'o mu c'usi xu' yu'unique co'ol chc'otic jech chac c'u cha'al ajvalil David. Li smomnich'nab Davide co'ol chc'otic jech chac c'u cha'al Dios, xchi'uc jech chac c'u cha'al yaj'almantal Dios ti ba'yucbe chbat yu'unique.

⁹ C'alal me la sta yorail le'e, ta xcules scotol li yantic banamil ti chtal scontrainic li Jerusalene.

¹⁰ “Li smomnich'nab David xchi'uc li jnaclumetic ta Jerusalene ta xcac'be ta yo'ntonic ti tstaic c'uxubinele, xchi'uc ti chisc'opanicune. Ta to xilic li boch'o xenbil xocon yu'unique. Ta to xlic yoc'taic jech chac c'u cha'al ch-oc' boch'o chcham xnich'on ti c'ajumal jun xnich'one. Ta xlic yat yo'ntonic jech chac c'u cha'al li boch'o chcham sba xnich'one.

¹¹ Ta sc'ac'alil le'e ta to xlic tsots at-o'nton te ta Jerusalén jech chac c'u cha'al laj yat yo'ntonic ta Hadad-rimón te ta stenlejaltic Meguidoe.

¹² Ta scotol yosilalic ta x'oq'uic ta svoc'olvoc'ol ta jujuchop sbiic. Li smomnich'nab Davide slecoj ch-oq'uic, xchi'uc slecoj ch-oq'uic ec li antsetic yu'unique. Li smomnich'nab Natane slecoj ch-oq'uic, xchi'uc slecoj ch-oq'uic ec li antsetic yu'unique.

¹³ Li smomnich'nab Levie slecoj ch-oq'uic ec, xchi'uc slecoj ch-oq'uic ec li antsetic yu'unique. Li smomnich'nabtac Simeie slecoj ch-oq'uic ec, xchi'uc slecoj ch-oq'uic ec li antsetic yu'unique.

¹⁴ Ja' jech tspasic ta jujuchop sbiic li yantic israeletique; slecoj ch-oc' li viniquetique, slecoj ch-oc' li antsetique.