Zacarías 11 - Bible in Tzotzil de Chenalhó with Deuterocanon

Ch-ac'bat stoj smul li banquilaletic yu'un yajcontra israeletique

¹ Líbano, jamo li ti'coraltonetic avu'une; ac'o c'ac'uc ta c'oc' li ch'ut te'etic avu'une.

² C'uc'toj, oc'an, yu'un iyal xa ta lum li ch'ut te'e; lamal xa ta lum li te'etic ti toj lequique. Tulantic ta Basán, oc'anic, yu'un yalesbil xa scotol li pimil toyolal te'tique.

³ Li jchabichijetic avu'une ta x'oq'uic, ta x'avanic, yu'un tsoc xa li sve'ub chijetic ti toj jun yutsile. Ta xa x'oc' li leonetic avu'une, yu'un laj xa yich' ulesel li pimilal te'tic ta jot uc'um Jordane.

I'ac'atic ta sc'ob yajcontraic li israeletique

⁴ Jech laj yalbun li Muc'ul Dios cu'une: “Q'uelo me li chijetic ti chapal sc'oplal chich'ic milele.

⁵ Li boch'otic tsmanique muc muliluc cha'yic ti c'alal tsmilique. Ja' no'ox jech ec li boch'otic chchonique jech chalic: ‘Coliyalbun Dios, oy xa ep jtaq'uin’, xiic. C'alal ta jchabichij mu'yuc abul sba chil li xchije.

⁶ Ja' no'ox jech ec li vu'une mu'yuc ta jc'uxubin li israeletic li' nacalique; ta xcaq'uic ta sc'ob yan cristianoetic xchi'uc ta sc'ob ajvalil yu'unic. Ja' ta slajesic li lum li'i; mu'yuc ta jcoltaic loq'uel ta sc'obic”, xi li Muc'ul Diose.

⁷ Jech te lic jq'uel li chijetic ti chapal xa sc'oplal chich'ic milele, ja' li chijetic ti abul sbaique. La jsa' cha'ch'ix jte'. Li jch'ixe “C'uxubinel” xi sbi laj cac'be; li yane “Jmoj Tsobol” xi sbi laj cac'be.

⁸ Ta jun no'ox u la jtac loq'uel oxib jchabichijetic; lic ech'uc co'nton yu'unic, yu'un chopol lic yilicun.

⁹ Jech laj calbe li chijetique: “¡Mu'yuc xa ta jchabioxuc! ¡Me oy boch'o chcham avu'unique, ac'o chamuc! ¡Me oy boch'o chlaj ta milele, ac'o lajuc! ¡Me oy to boch'o cuxul chcome, te ti'o abaic!”, xcut.

¹⁰ La jtsac li jte' “C'uxubinel” sbie, la jc'as. Ja' senyail ti la jlajesbe sc'oplal c'usi yaloj Dios ta stojol li yantic lume.

¹¹ Ja' jech sc'ac'alil ilaj sc'oplal li c'usi chapanbile. Li chijetic ti oy svocolique te tsq'uelic li c'usi ta jpase, jech la sna'ic ti ja' Dios ic'opoj ta sventa li c'usi la jpase.

¹² Jech lic calbeic: “Me xu' chava'yique, ac'bicun jtojol; yan me mu xu' chava'yique, te yil”, xcut. Jech te lic yac'bicun lajuneb xcha'vinic (30) ta sep saquil taq'uin.

¹³ Jech laj yalbun li Muc'ul Diose: “Ich'o li taq'uine, bat ac'o ta yavil taq'uin ta ch'ulna”, xiyutun. Ja' li taq'uin ti toj ep laj yac'bicun chalique. La jtsac li lajuneb xcha'vinic (30) ta sep saquil taq'uine, te bat cac' ta yavil taq'uin ta ch'ulna.

¹⁴ Te lic jc'as noxtoc li yan jch'ix te' “Jmoj Tsobol” sbie. Ja' senyail ti mu xa lecuc chil sbaic li Judá xchi'uc Israele.

¹⁵ Jech laj yalbun noxtoc li Muc'ul Diose: “Ich'o li c'usitic chtun avu'un sventa jchabichije; cuyo aba jech chac c'u cha'al jun jchabichij ti mu xich' ta muc' yabtele.

¹⁶ Yu'un ta to xcac' licuc jun jchabichij li' ta avosilalic ti mu'yuc ta yo'nton li chij chch'aye, ti mu xbat st'un tale, ti mu xpoxta ti bu yayijeme, ti mu'yuc ta yo'nton ti bu tsotsic toe. Ja' no'ox ta smil sti' ti bu lec jubene, c'alal ta svoy chc'uxbe.

¹⁷ Toj abul sba li chopol jchabichij ti chicta comel li chijetique. ¡Ac'o lajuc ta espada li sc'obe xchi'uc li sbats'isate! ¡Ac'o ste' sba o ta j'ech'el li sc'obe, xchi'uc ac'o tubuc o ta j'ech'el li jbej sate!”, xi li Diose.