Zacarías 10 - Bible in Tzotzil de Chenalhó with Deuterocanon

Li Diose laj yal ti chlic scolta li steclumale

¹ C'anbeic Muc'ul Dios ti ac'o yac'boxuc tal vo' ti c'alal yoraile. Ja' Muc'ul Dios ta xac' tal sacsevuletic, jech lec tsots chyal tal yu'un li vo'e. Jech ta xyaxub lec ts'i'laletic ta avosil abanamilic li jujunoxuque.

² Li c'usi chalic sdiosic ta jujubej nae mu meleluc; li c'usi chilic li jt'unuletique puru epalc'op. Li c'usi chalique vontol vaychil no'ox, mu'yuc smelol; li spatubil co'ntontic chalique mu'yuc stu. Ja' yu'un li jteclume chch'ayic ta be jech chac c'u cha'al chijetic; oy svocolic, yu'un mu'yuc xchabielic.

³ Ja' yu'un jech chal li Muc'ul Diose: “Tsanem sc'ac'al co'nton ta stojol li jchabichijetique; ta xcac'be stoj smulic li j'uts'intavanejetique”, xi. Li Muc'ul Diose ta xchabi li xchijtaque, ja' li smomnich'nab Judae; ja' jech ta xc'ot yu'un jech chac c'u cha'al tsatsal ca' sventa pasc'op.

⁴ Te ta xloc' ta stojolic li ton chtun ta sventa chiquin nae, xchi'uc li lucaxte' sventa chich' nituel o carpanae. Te ta xloc' ta stojolic li flecha sventa pasc'ope; te ta xloc' ta stojolic scotol li banquilaletique.

⁵ Ja' jech chc'otic jech chac c'u cha'al soldadoetic ti chpech'ic ta teq'uel yajcontraic ta ach'eltic ta xoraltique. Xu' yu'unic pasc'op, yu'un te chi'inbilic yu'un li Muc'ul Diose; li soldadoetic ti cajajtic ta ca' chanovique yalem ta q'uexlal chcom yu'unic.

⁶ Jech chal li Muc'ul Diose: “Vu'un ta xcac'be stsatsalic li smomnich'nab Judae; vu'un ta jcoltaic li smomnich'nab Josee. Ta xquiq'uic sutel tal ta yosilalic, yu'un toj c'uxic ta co'nton. Xco'laj xchi'uc mu'yuc jbajojic chc'ot o; ta xca'ibe sc'opic, vu'un Muc'ul Diosun yu'unic o.

⁷ Li Efraine ja' jech chc'ot jech chac c'u cha'al soldado ti lec xu' yu'une; xcuxet no'ox yo'nton jech chac c'u cha'al boch'o xcuxet no'ox yo'nton ta scoj ya'lel ts'usub. C'alal chilic li xnich'nabe, xcuxet no'ox yo'ntonic ec; xcuxet no'ox yo'ntonic ta sventa li Muc'ul Diose.

⁸ “Vu'un ta jpiubtaic tal; vu'un ta jtsobic tal, yu'un coltabilic cu'un. Ta xlic jbolesic jech chac c'u cha'al ta vo'one.

⁹ Vu'un la jpuquic batel ta yantic banamil, pero te ta namal banamil chlic st'abicun ta yo'ntonic; jech ta to sta yorail ta sutic tal xchi'uc yalab xnich'nabic li boch'o cuxul to icomique.

¹⁰ Ta xquiq'uic loq'uel tal ta yosilal Egipto; ta xquiq'uic sutel tal ta yosilal Asiria; ta xquiq'uic batel ta Galaad xchi'uc ta Líbano, pero mu x'ochic o ti c'u smuc'ul chcac'be yosilique.

¹¹ Ta xtuch'ic jelovel tal li nab ti toj xi'bal sbae. Ta jlajesbe stsatsal yip li nabe; ta jtaquijes li uc'um Nilo ti toj nat xchaque. Ta jlajesbe sc'oplal stoyobbail li Asiriae; j'ech'el ta jc'asbe svaston li Egiptoe.

¹² Vu'un ta xcac'be stsatsalic; xu' yu'unic ta jventa”, xi li Muc'ul Diose.