Sofonías 3 - Bible in Tzotzil de Chenalhó with Deuterocanon

Sc'oplal smul xchi'uc scoltael Jerusalén

¹ Toj abul aba, jbajmantal lum, vo'ot ti bolibenot, ti j'uts'intavanejote.

² Muc xava'ay c'opanel; muc xavich' ta muc' li chanubtasele. Muc ja'uc xapat avo'nton yu'un li Muc'ul Diose; muc ja'uc lanopaj batel ta stojol li Dios avu'une.

³ Li banquilaletic avu'une xlaquetic no'ox jech chac c'u cha'al leonetic; li jchapanvanejetic avu'une ja' jechic jech chac c'u cha'al oq'uiletic ti chbat stsac sve'el ta bat c'ac'al, ti mu xa jch'ixuc sbac tscomtsan ta sventa yoc'omale.

⁴ Li j'alc'opetic avu'une mu'yuc stu li c'usi chalilanique, puru jlo'lavanejetic. Li paleetic avu'une ja' tsbolibtasic li ch'ulna cu'une, ja' la soquesic li mantaletic cu'une.

⁵ Pero li Muc'ul Diose tuc' c'usi tspas te ta lum, mu ja'uc tspas li c'usi muc tuc'uque. Ta jujun sob chac' ta ilel ti tuc' c'usi tspase; mu'yuc bu chquechan o spasel junuc velta. Pero li chopol cristianoe mu xotquin q'uexlal ta scoj li smule.

⁶ Jech chal li Muc'ul Diose: “La jyavnaijes ep banamiletic, la jvuq'ues ep toyol q'uelub osiletic; jeche' xch'ijan la jcomtsan li xoraltique, me junuc mu'yuc boch'o te chjelov o. Li lumetic yu'une la jyavnaijes o; mu'yuc yajval icom, mu'yuc jnaclumetic icom o.

⁷ Jech la jnop: ‘Ja' van jech chlic yich'un o ta muc' li Jerusalene; ja' van jech chlic xch'un o li taq'uiel ta xcac'bee, jech mu'yuc ta jyavnaijes o ta sventa li stojol smul laj cac'bee’, xichi. Pero yo'to ech'em laj yac'be yipal spasel li c'usitic chopole.

⁸ Ja' yu'un malaun avilic c'usi ora tsta sc'ac'alil cu'un ta jchapanbe smul, yu'un jnopoj xa ta jtsob tal muc'tic lum xchi'uc muc'tic ajvaliletic. Ta jmalbe tal ta stojol scotol li sc'ac'al co'nton ti tsanem jech chac c'u c'oq'ue. Li yip sc'ac'al co'ntone ta xchic' scotol li banamile.

⁹ “C'alal me la sta li sc'ac'alil le'e, ta xcac' puru lequil c'op chloc' ta yeic ep cristianoetic ta jujun lum, yu'un jech xu' chlic sc'anbicun vocol, vu'un li Muc'ul Diosune; yu'un jech co'ol chlic tunicuc cu'un scotolic.

¹⁰ Ja' yu'un li jteclumal ti spucoj sbaic batel ta sjelovel to uc'umetic ta Etiopía banamile ta xlic sc'anbicun vocol, ta xlic yac'bicun jmoton.

¹¹ Jteclumal, me la sta sc'ac'alil le'e, mu'yuc xa chaq'uexovic yu'un li c'usitic laj to'ox apasique, xchi'uc ti laj atoy abaic ta jtojole; yu'un ta jloq'ues ta atojolic li jtoybaetique, jech mu'yuc xa boch'o tstoy sba yan velta te ta ch'ul vits cu'un.

¹² Ja' xa no'ox ta jcomtsan ta atojol li boch'o lequic ti biq'uit yac'oj sbaique, ti ja' no'ox tspat yo'nton ta jtojol, vu'un li Muc'ul Diosune.

¹³ Li scomelal israeletique mu'yuc xa tspasic c'usi chopol; mu'yuc xa ch-epalc'opojic; mu'yuc xa chlo'lavanic xchi'uc li yeique. Jun yo'nton tsmac'lin sbaic; jun yo'nton chvayic; mu'yuc xi'el cha'yic”, xi li Diose.

Q'ueoj ta sventa slequilal Jerusalén

¹⁴ ¡Lum Sión, q'uejinan! ¡Israeletic, avananic ta xcuxetel avo'ntonic! ¡Jerusalén, solel cuxetuc no'ox avo'nton, tse'inan no'ox!

¹⁵ Li Muc'ul Diose laj xa sloq'ues batel ta atojol li chapanel chayac'bote; laj xa sjip loq'uel li avajcontrataque. Li Muc'ul Diose ja' li Ajvalil yu'un Israele, te oy ta atojol, jech mu'yuc xa c'usi chopol chtal ta atojol.

¹⁶ Jerusalén, ta sc'ac'alil le'e jech cha'albat: “Mu xaxi', Sión; mu me x'alub avoc ac'ob”, xi ac'oplal.

¹⁷ Li Muc'ul Dios ti ech'em stsatsale te oy ta atojol, ja' chascoltaot; xcuxet no'ox yo'nton ta atojol. Mu'yuc c'usi chal, yu'un lec sc'anojot; xcuxet no'ox yo'nton ta xq'uejin ta atojol jech chac c'u cha'al ta yorail q'uin.

¹⁸ Li Muc'ul Diose jech chal: “Vu'un ta jcoltaot ta sventa li tsots vocole, vu'un ta jcoltaot ta sventa ti bu tiq'uilot ta q'uexlale.

¹⁹ Ta sc'ac'alil le'e ta xcac'be stojolic scotol li boch'otic laj yuts'intaicote. Ta jcolta li chij ti xcoxcun chanove, xchi'uc ta xquic' sutel tal ti butic ch'ayemic batel ta bee. Ta xcac' ta ich'el ta muc'; ta xcac' pucuc sc'oplal ta sbejel banamil.

²⁰ Me la sta li sc'ac'alil le'e, ta xquic'oxuc sutel tal, ta jtsoboxuc sutel tal; ta xcac' pucuc ac'oplalic, ta xcac'oxuc ta ich'el ta muc' ta stojol scotol cristianoetic ta banamil, chavil ta asatic chacac'boxuc yan velta li alequilalique”, xi li Muc'ul Diose.