Sofonías 2 - Bible in Tzotzil de Chenalhó with Deuterocanon

¹ Tsobo abaic acotolic, nopo lec ava'yic, vo'oxuc ti mu'yuc q'uexlal chava'yique.

² Yu'un yo'to muc chc'ot ta pasel li c'usi chapal sc'oplale, yo'to muc tsta yorail chacuchatic batel ta ic' jech chac c'u cha'al taquijobel ti ta jun no'ox c'ac'al xu' tsacch'aye, xchi'uc yo'to muc chc'ot ta atojolic li sc'ac'al yo'nton Muc'ul Diose, yo'to muc chtal ta atojolic li sc'ac'alil ch-ilin Muc'ul Diose.

³ Vo'oxuc ti toj biq'uit cha'ilatic li' ta banamile ja' sa'ic li Muc'ul Diose. Vo'oxuc ti ja' chapasic c'usi tsc'an Diose, ja' pasic li c'usitic tuq'ue, muc'uc no'ox avo'ntonic, naca me jech colem chac'otic c'alal tsta sc'ac'alil ch-ilin li Muc'ul Diose.

Ch-ac'bat stoj smulic yu'un Dios li yantic banamile

⁴ Li lum Gazae jeche' xch'ijan chcom; li Ascalone yavnaijem chcom o. Li jnaclumetic ta Asdode ta c'ac'altic lec chtal yich'ic nutsel loq'uel; li jnaclumetic ta Ecrone ta xich'ic pitsel o loq'uel.

⁵ Toj abul abaic jnaclumetic ta Creta ti te nacaloxuc batel ta ti'ti' nabe. Li Diose jech xa laj yal ta aventaic: “¡Canaán, yosilal filistaetic, ta jyavnaijesot o ta j'ech'el; me jutuc mu'yuc jnaclumetic ta xcom o avu'un!

⁶ Li banamil te ta ti'ti' nabe ta jc'atajes ta sve'ub chijetic; ta jc'atajes ta stsobleb jchabichijetic, xchi'uc ta jc'atajes ta yav scoralil chijetic”, xi li Diose.

⁷ C'alal ta xlic yich'ic coltael yu'un Dios yu'unic li scomelal judaetique, c'alal ta xlic sventain stuquic li yosilique ta xlic staic yan velta slequilalic. Te ta xchabi xchijic, te ta xvayic ta naetic ta Ascalón.

⁸ Li Muc'ul Dios ti tspas ta mantal scotol te ta vinajele jech chal: “Laj ca'ay c'u x'elan ta xlabanvan li Moabe, xchi'uc c'u x'elan ta xchopolc'opoj li Amone. Solel la xchopolc'optaic li jteclumale; tstoy sbaic, tsnopic ti xu' yu'un tspojbeic li yosilalique.

⁹ Ja' yu'un chcal ta jamal ta sventa jbi jtuc, vu'un li Cuxul Diosun yu'un Israele: Li Moabe ja' jech ta xcom jech chac c'u cha'al Sodoma; li Amone ja' jech ta xcom jech chac c'u cha'al Gomorra. Yavil ch'ixtic ta xcom, sloq'uem ats'am ta xcom; jeche' xch'ijan ta xcom o. Li scomelal jteclumale ja' ta xlic spojic scotol; li scomelal jteclumale ja' ta xu'uninic o”, xi li Diose.

¹⁰ Ja' jech stojol ta xich'ic ta scoj stoyobbailic li Moab xchi'uc Amone, yu'un la slabanic, la smuq'uibtas batel yosilalic ta stojol li steclumal Muc'ul Dios ti tspas ta mantal scotol te ta vinajele.

¹¹ Ja' yu'un li Muc'ul Diose toj xi'bal sba tspas sba ta stojolic; ta xules scotol li diosetic li' ta banamile. Jech chlic ich'atuc ta muc' ta buticuc no'ox banamilal, xchi'uc chlic ich'atuc ta muc' te ta banamiletic ti cacajtic ta nabe.

¹² Vo'oxuc ti te oyoxuc ta Etiopiae, milbil chachamic ta yespada Muc'ul Dios ec.

¹³ Ta xac' batel sc'ob ta scontrainel li nortee, jech ta x'ul o li Asiriae, jech ta xyavnaij o li lum Ninivee; ta sc'atajes o ta taqui xocol banamil.

¹⁴ Ja' te ta xtal xcux yo'ntonic li chijetique xchi'uc scotol li jaychop chonbolometique; ja' te chtal vayicuc ta joljol oyetic li pelícano mutetique xchi'uc li erizo chonetique. Te ta x'oq'uic ta ventanaetic li curutsuquetique; te ch-oq'uic ta smarcoal ti'naetic li jojetique, yu'un chich' lilinbel scotol li ste'eltaque.

¹⁵ Ja' jech chc'ot ta pasel ta stojol li jun lum ti toj xcuxet yo'ntone, ti toj jun to'ox yo'ntone, ti jech to'ox chal ta yo'ntone: “Vu'un no'ox jtuc, mu'yuc xa boch'o yan jech”, ti xi to'oxe. ¡C'uxi bat yavnaijuc, c'uxi ipas ta xch'en jti'val chonbolometic! Li boch'otic te chjelovique xpilajetic no'ox; yan xa xich' spasic ta slabanel.