Sofonías 1 - Bible in Tzotzil de Chenalhó with Deuterocanon

I'ilin Muc'ul Dios

¹ C'alal yorail tiq'uil ta ajvalilal ta Judá li Josías xnich'on Amone, ja'o ital c'opanatuc yu'un Dios li j'alc'op Sofoniase. Li Sofoniase ja' xnich'on Cusi, xchi'uc ja' smoltotac ta vo'one li Gedalías, Amarías, xchi'uc Ezequiase.

² Jech chal li Muc'ul Diose: “Ta xcules o ta j'ech'el scotol li c'usitic oy li' ta sba banamile.

³ Ta xcules li cristianoetique xchi'uc li chonbolometique; ta xcules li mutetique xchi'uc li choyetic ta nabe. Ta jbul loq'uel li chopol cristianoetique; ta xcules o scotol li cristianoetic li' ta sba banamile”, xi li Muc'ul Diose. Jech chal noxtoc li Muc'ul Diose:

⁴ “Ta jyales jc'ob ta stojol li Judae xchi'uc ta stojol scotol li jnaclumetic ta Jerusalene. Ta xcules o li' ta banamil li scomelal sdiosic Baale, xchi'uc ta jtu'pbe o sc'oplal li paleetic, li j'abteletic yu'une.

⁵ Ta xculesic noxtoc li boch'otic chmuyic ta yamaq'uil jol na tsquejan sbaic batel ta stojol li c'usitic oy ta vinajele, xchi'uc li boch'otic tst'abbicun jbi c'alal oy c'usi chalique, xchi'uc ti tst'abbeic sbi noxtoc li sdiosic Milcome.

⁶ Jech ta xculesic noxtoc li boch'otic inamajic loq'uel ta jtojole, ti muc vu'cun la sa'icune, ti muc vu'cun tal sjac'bicun li c'usi tsc'an tsna'ique”, xi.

⁷ Ch'anchanic, mu me xabaq'uic ta stojol li Muc'ul Diose, ja' li Cajvaltique yu'un nopol xa sc'ac'alil li Muc'ul Diose. Li Muc'ul Diose chapal xa yu'un li milbil matanaletique; t'ujbil xa yu'un li boch'otic yic'anoj ta ve'ele.

⁸ C'alal yorail chac' milbil matanal li Muc'ul Diose, ja' yorail chac'be stoj smul li banquilaletic xchi'uc li xnich'nab ajvalile xchi'uc li boch'otic chchanbeic stalel yantic lume.

⁹ Me la sta sc'ac'alil le'e, ta xich'beic stojol noxtoc li boch'otic ta xbitujic ochel ta nuc' na, ti tsnojesbeic o sna yajvalic ta yeleq'uique, xchi'uc li c'usitic yan ta spojic ta sventa uts'intavaneje.

¹⁰ Jech chal li Muc'ul Diose: “Ta sc'ac'alil le'e ta to xvinaj ov ta sc'anel coltael te yo' bu Choyal ti'coralton sbie. Ta to xme'on oq'uic te ta xcha'voc'al lum, xchi'uc xc'ulet no'ox yech'al ta vitsetic c'alal chvuc' li naetique.

¹¹ Oc'anic me, jnaclumetic te ta slomlejal, yu'un ta xlajic scotol li jchonolajeletique; ta x'ulic scotol li jmanulajeletique.

¹² “C'alal tsta sc'ac'alil le'e, ta luz ta jq'uel lec c'u x'elan li Jerusalene. Ta xcac'be stoj smulic li cristianoetic ti jun no'ox yo'ntonic jech chac c'u cha'al ya'lel ts'usub ch'anxi ts'anale, ti jech chal ta yo'ntonique: ‘Li Muc'ul Diose mu'yuc c'usi lec tspas, mu'yuc c'usi chopol tspas; me jutuc mu'yuc c'usi tspas o’, ti xiique.

¹³ Ja' yu'un ta xich'ic pojbel li c'usitic oy yu'unique, xchi'uc ta xich'ic jinesbel li snaique. Ta to spas snaic, pero mu'yuc ta snainic; ta sts'un sts'usubic, pero mu'yuc ta xuch'beic ya'lel”, xi li Diose.

¹⁴ ¡Nopol xa sc'an sta li smuc'ta c'ac'alil Muc'ul Diose, po'ot xa, jutuc xa sc'an! ¡Toj c'ux me vocol c'alal chtal sc'ac'alil li Muc'ul Diose; ta to me x'avanic ta oq'uel li boch'o toj tsots yo'ntonic ta pasc'ope!

¹⁵ Ja' sc'ac'alil ch-ilin li Muc'ul Diose; ja' sc'ac'alil at-o'nton, xchi'uc vocolajel; ja' sc'ac'alil oq'uel avanel xchi'uc yavnaijesel; ja' sc'ac'alil ic' osil xchi'uc ac'ubaltic; ja' sc'ac'alil chmac osil xchi'uc but'ulaltic.

¹⁶ Ja' sc'ac'alil chich' jupanel oq'uesetic xchi'uc avanel sventa pasc'op, ta sventa li lumetic ti setbilic lec ta coraltone, xchi'uc ta sventa li toyol q'uelub osiletique.

¹⁷ Jech chal li Muc'ul Diose: “Ta xcac'be svocol li cristianoetique, jech xco'laj xchi'uc ma'satetic ta xanovic, yu'un la sa' smulic ta jtojol vu'un li Muc'ul Diosune. Li xch'ich'alique te no'ox ta xmal batel ta banamil jech chac c'u cha'al vo'; li sbec'talique ja' jech chbat jech chac c'u cha'al c'a'ep”, xi li Diose.

¹⁸ Me la sta sc'ac'alil chlic sc'ac'al yo'nton li Muc'ul Diose, mu'yuc boch'o xu' tspoj sba ta c'anal taq'uin o me ta saquil taq'uin, yu'un sbejel banamil ta xchic' c'alal chlic sc'ac'al yo'nton li Muc'ul Diose; ta xchic' scotol li banamile. Ta jliquel no'ox xu' ch-ulic scotol li jnaclumetic li' ta banamile.