Santiago 4 - Bible in Tzotzil de Chenalhó with Deuterocanon

Tsc'an mu ja'uc chbat co'ntontic yu'un c'usitic oy li' ta banamil

¹ Li sliqueb c'op, li sliqueb utbail avu'unique ¿me mu ja'uc ta scoj ti mu xapajes abaic ta sc'upinel li c'usi chac'anique? ¿Me mu ja'uc chastsaloxuc li xpich'etel avo'ntonique?

² Bats'i juteb avo'ntonic yu'un, pero mu xataic. Jech chlic milvanan achi'uquic, chlic acontrain abaic, chlic ati'-o'nta abaic, chlic asa'ic c'op, pero mu xataic o li c'usi chac'anique. Mu xataic ta scoj ti mu xac'anbeic li Diose.

³ Ac'o me chac'anbeic li Diose, pero mu xataic, yu'un chopol c'usi oy ta avo'ntonic. Ja' no'ox chac'an chalajesic o ta spasel li c'usi tsc'an avo'ntonique.

⁴ ¡Jmulaviloxuc ta stojol Dios! ¿Me mu xana'ic ti yajcontra Dios chijc'ot me ja' ta jc'antic c'usi sventa banamile? Li boch'o ja' lec chil sba xchi'uc li c'usitic sventa banamile, ja' yajcontra Dios chc'ot.

⁵ Mu me xanopic ti mu'yuc stu ti jech ts'ibabil ta sc'op Diose: “Li Diose laj yac' ta co'ntontic ti tsc'an stuc no'ox ac'o quich'tic ta muq'ue”, xi ts'ibabil.

⁶ Pero li Diose slequil no'ox yo'nton chixc'uxubinutic, ja' yu'un jech ts'ibabil: “Li Diose tscontrain li jtoybaetique; yan li boch'o biq'uit chac' sbaique ja' ta xc'uxubin”, xi.

⁷ Ja' yu'un ac'o abaic ta sc'ob li Diose. Ja' contrainic li pucuje, jech chjatov loq'uel ta atojolic.

⁸ Nopajanic ta stojol li Diose, jech chnopaj ta atojolic ec. Comtsanic c'usitic chopol chapasic vo'oxuc jpasmuliletic. Lecubtaso avo'ntonic vo'oxuc ti cha'jot bu avac'oj avo'ntonique.

⁹ Ato avo'ntonic, oc'tao abaic. Li tse'ej chapasique ac'o c'atajuc ta avoq'uelic. Li xcuxetel avo'ntonique ac'o c'atajuc ta yatel avo'ntonic.

¹⁰ Ja' lec biq'uit xavac' abaic ta stojol li Cajvaltique, jech lec muc' chac'otic yu'un.

Tsc'an mu jcuy jbatic ta jchapanvanej yu'un li jchi'iltique

¹¹ Quermanotac, mu me xachopolc'opta abaic. Li boch'o ta xchopolc'opta xchi'ile, me mu'yuc stu chile, ja' xa ta xchopolc'opta o c'usi chal li mantaletique. Ja' xa mu'yuc stu chc'ot yu'un li mantaletique. Me jech vo'ot mu'yuc stu avu'un li mantale, mu xa vo'ocot chach'un li mantale; vo'ot xa jchapanvanejot chac'ot yu'un.

¹² Pero jun no'ox Boch'o laj yac' li mantale, xchi'uc ja' Jchapanvanej noxtoc. Ja' xu' yu'un chiscoltautic, xchi'uc ja' xu' yu'un chijyulesutic. Li vo'ote ¿c'usi avabtel ti chaval c'u x'elan li achi'ile?

Tsc'an mu jnop ta yipal co'ntontic c'usi ta jpastic ta yoc'omal

¹³ Li' ta orae a'yo me ava'yic vo'oxuc ti jech chavalique: “Tana, o me oc'ome, batic ta junuc lum. Te jalijcutic junuc jabil, te manulajcutic; te bolomajcutic, jech ta jtatic ep taq'uin”, xachiic.

¹⁴ Pero mu xana'ic me cuxuloxuc ta yoc'omal. Yu'un ja' jechoxuc jech chac c'u cha'al lumal toc ti ta anil no'ox ta xtale, xchi'uc ti ta anil no'ox ta sacch'ay batele.

¹⁵ Li c'usi tsc'an chavalique ja' jech chac li'i: “Me jech to tsc'an Cajvaltic cuxulutique, xu' ta jpastic jech”, chianic no'ox.

¹⁶ Pero li vo'oxuque ta atoyobbailic no'ox li c'usi chavalique. Scotol li toybaile ja' chopol.

¹⁷ Li boch'o sna' c'usi lec ta pasel, me mu spase, ja' mulil.