Santiago 1 - Bible in Tzotzil de Chenalhó with Deuterocanon

Patub o'ntonal

¹ Vu'un Santiagoun,, vu'un yajtunelun Dios xchi'uc li Cajvaltic Jesucristoe. Chabanuc chacalboxuc tal vo'oxuc li lajcha'chop sts'unubaloxuc Israel ti butic puquemoxuc batel ta yantic banamile.

Me ta jtatic vocol jech chijtsatsub ta stojol Dios

² Quermanotac, cuxetuc no'ox avo'ntonic c'alal me chtal ep ta chop preva ta atojolique,

³ yu'un xana'ic me ta xich' q'uelel xch'unojel avo'ntonic ta sventa li prevae, ta x'ayin lec smuc'ul avo'ntonic ta sts'iquel li vocoletique.

⁴ Me oy smuc'ul avo'ntonique, tsc'an lec chbat yabtelal noxtoc, jech lec ts'acal chbat avu'unic; mu'yuc xa c'usi yan sc'an avu'unic.

⁵ Me oy boch'o mu'yuc sbijil avu'unique, c'anbeic li Diose; ja' chayac'boxuc. Yu'un li stuque yutsil yo'nton ta xac'; mu sna' x'ech' yo'nton ta c'anbel.

⁶ Pero tsc'an oy xch'unojel avo'ntonic ti c'alal chac'anique; tsc'an mu chibuc avo'ntonic. Yu'un li boch'o chib yo'nton tsc'ane, ja' jech chac c'u cha'al nab ti chich' yuq'uilanel ta jujujot yu'un iq'ue.

⁷ Li boch'o jech yo'nton le'e, mu me snop ti oy c'usi ch-ac'bat yu'un Cajvaltique.

⁸ Yu'un tsjelilan li c'usi tsnope; mu junuc no'ox li be tstam batele, yu'un xtal xbat no'ox li yo'ntone.

⁹ Li jch'unolajel ti toj abul sbae, cuxetuc no'ox yo'nton ta sventa ti oy xa c'usi toj lec staoje.

¹⁰ Li jc'uleje biq'uit ac'o yac' sba, yu'un li sc'ulejale ja' jech chac c'u cha'al xnich ts'i'lal ti mu xjalije.

¹¹ C'alal ta xloc' c'ac'ale, c'alal tsots ta xc'uxube, ta xtaquij li ts'i'lale. Li xniche ta xlilij yalel jech ta xch'ay o li st'ujumale. Ja' no'ox jech ec li jc'uleje, c'alal yochel sa'el sc'ulejale, te ta xch'ay o batel xchi'uc.

Me chcuch cu'untic li preva chtal ta jtojoltique, chc'ot quich' jmotontic

¹² Xcuxet no'ox yo'nton li boch'o ta xcuch yu'un li preva chtal ta stojole, yu'un me lec iloc' yu'une, ta xich' scorona sventa chcuxi; yu'un yaloj ono'ox Dios ta xac'be li boch'o sc'anojic Diose.

¹³ Li boch'o tsujat ta spasel c'usi chopole, mu me snop ti ja' tsujat yu'un li Diose. Yu'un li Diose mu sujat ta spasel c'usi chopol li stuque, jech mu xisujutic ta spasel c'usi chopol noxtoc.

¹⁴ Li jujunutique scoj yu'un jech co'nton ta jpastic li c'usi chopole, jech chijyic'utic, chislo'lautic.

¹⁵ Yu'un c'alal chcac'tic ayinuc li xpich'etel co'ntontique, ta xlic voc'uc li mulile. C'alal me laj xa xchanbe yipale, chac' lajel.

¹⁶ Quermanotac, vo'oxuc ti lec jc'anojoxuque, mu me xalo'la abaic.

¹⁷ Scotol li c'usi leque xchi'uc li c'usitic lec tuc' chij'ac'bate ja' te ta xlic tal ta vinajel. Ja' chistacbutic tal li Jtotic Dios ti la spas li c'usitic chac' xojobale. Li Diose ja' jech oy o; mu sna' sjelilan c'usi chijyac'butic.

¹⁸ Ta sventa ti jech la sc'an stuc li Diose, jech laj yac' cha'voc'cutic ta sventa li sc'op ti ja' melele, jech vu'utic sliqueb lijc'ot yu'un scotol li c'usitic spasoje.

Tsc'an ac'o jpasbetic yabtelal li sc'op Dios jch'unojtique

¹⁹ Quermanotac, vo'oxuc ti lec jc'anojoxuque, a'yo lec ava'yic li c'usi cha'albatique. Mu xac'opojic ta anil; mu xa'ilinic ta anil.

²⁰ Yu'un li boch'o ta x'iline, mu xa ja'uc tspas li c'usi lec chil Diose.

²¹ Ja' yu'un li vo'oxuque, comtsanic scotol li c'usitic mu xtune xchi'uc li c'usitic chopol ti epajem xae. Biq'uit xavac' abaic c'alal chava'yic li sc'op Dios ti ts'unbil xa ta avo'ntonique, yu'un ja' oy stsatsal xu' chacolic yu'un.

²² Pasic me li c'usi chava'yic ta sc'op Diose. Mu me ja'uc no'ox chava'yilanic, yu'un jech mu ja'uc no'ox chalo'la abaic.

²³ Li boch'o ja' no'ox cha'yilan sc'op Diose, me mu spase, ja' jech chac c'u cha'al jun vinic ti ta sq'uel sat ta nene.

²⁴ Ac'o me laj yil c'u x'elan li sate, pero ich'ay ta yo'nton; lec no'ox cha'ay sba ti c'alal chanov batele.

²⁵ Yan li boch'o mu xch'ay ta yo'nton c'usi cha'ye, ti ja' te oy o ta yo'nton li lequil mantal ti ja' chac' colcutique, xchi'uc ti chch'un o li c'usi chale, xcuxet no'ox yo'nton yu'un li c'usi ta spase.

²⁶ Me oy boch'o chal ti lec xch'unoje, pero me mu sna' spajesel yee, ja' no'ox ta slo'la sba. Mu'yuc stu chc'ot li c'usi xch'unoje.

²⁷ Me ta melel lec xch'unoje, mu'yuc c'usi chopol tspas ta stojol li Jtotic Diose. Ja' no'ox jech tspas chac li'i: Ta sq'uel me'on ololetic xchi'uc me'on antsetic ti c'alal oy svocolique, xchi'uc mu soques sba ta sventa li c'usitic chopol li' ta banamile.