Salmos 99 - Bible in Tzotzil de Chenalhó with Deuterocanon

Ja' Ajvalil stuc li Diose

¹ Li Muc'ul Diose ja' muc'ta Ajvalil stuc, ac'o nicuc scotol cristianoetic ta jujun lum; li Muc'ul Diose te chotol ta xchotleb ta sba yac'ol li querubinetique, ac'o nicuc sbejel banamil.

² Li Muc'ul Diose ja' no'ox stuc ich'bil ta muc' te ta vits Sión; ja' cajal oy ta scotol li lumetique.

³ Ac'o ich'biluc o ta muc', yu'un toj ech'em smuc'ul, ja' no'ox stuc xi'bil. Ja' Ch'ul Dios stuc.

⁴ Muc'ul Dios, vo'ot li muc'ul Ajvalilote, toj ech'em avu'el. Ja' chac'an li c'usitic tuq'ue; vo'ot laj avac' li c'usitic tuq'ue; lec tuc', oy lec smelol c'usi laj apas ta stojol li smomnich'nabtac Jacobe.

⁵ Ich'ic ta muc' li Muc'ul Dios cu'untique; quejano abaic ta stojol te ta stec'um yacan, yu'un ja' Ch'ul Dios stuc.

⁶ Li Moisés xchi'uc Aarone ja' no'ox i'abtejic ta paleal yu'un Dios; li Samuele ja' no'ox ic'opoj ta stojol Dios. C'alal la sc'anbeic vocol li Muc'ul Diose, itac'bat li sc'opique.

⁷ Ta jvol toc ic'opanatic yu'un li Diose; la xch'unbeic li smantaltaque xchi'uc li c'usi yan i'albatic comele.

⁸ Muc'ul Dios, vo'ot li Diosot cu'uncutique, laj atac'be li sc'opique; vo'ot Diosot yu'unic ti toj ep ts'icumal avu'une, xchi'uc vo'ot laj avac'be stoj smulic noxtoc.

⁹ Ich'ic ta muc' li Muc'ul Dios cu'untique; quejano abaic ta stojol te ta ch'ul vits yu'un, yu'un li Muc'ul Dios cu'untique ja' ch'ul Dios stuc.