Salmos 98 - Bible in Tzotzil de Chenalhó with Deuterocanon

Li Muc'ul Diose ja' no'ox stuc ich'bil ta muc', yu'un tuc' chchapanvan

Q'ueoj.

¹ Q'uejintaic ta ach' q'ueoj li Muc'ul Diose, yu'un spasoj xa ep muc'tic sq'uelubiltac; laj xa spas canal ta sventa smuc'ul stsatsal.

² Li Muc'ul Diose laj xa yac' ta ilel ti ta melel ja' xu' yu'une; ta stojol muc'tic lum laj yac' ta ilel li tuq'uil chapanel yu'une.

³ Mu'yuc bu la xch'ay o li c'uxubinel yu'une xchi'uc li c'usi melel yaloj ta stojol smomnich'nabtac Israele; c'alal to ta sti'il banamil ivinaj ti ja' spasoj canal li Dios cu'untique.

⁴ Jnaclumetic ta banamil, cuxetuc no'ox avo'nton q'uejinanic yu'un Muc'ul Dios. Avetanic no'ox ta q'ueoj, t'omeso scotol li xcuxetel avo'ntonique; q'uejinanic lec ta sonetic.

⁵ Q'uejinanic ta arpa ta sventa li Muc'ul Diose; la'etanic no'ox ta q'ueoj ta sventa li c'usitic chich' tijele.

⁶ Q'uejinanic ta oq'uesetic; jupanic cachuetic ta stojol li Ajvalile, ja' li Muc'ul Diose.

⁷ Ac'o avanicuc ec li nabetique xchi'uc scotol li c'usitic te oye; ac'o avanuc li banamile xchi'uc li boch'otic te nacajtique.

⁸ Ac'o spac' sc'obic ec li muc'tic uc'umetique; ac'o cuxetuc no'ox yo'nton scotol li vitsetique.

⁹ Scotolic ac'o cuxetuc yo'ntonic ta stojol li Muc'ul Diose, yu'un ja' chtal xchapan sbejel li banamile. Lec tuc' chchapan scotol li banamile; lec co'ol chchapan scotol li jujun lume.