Salmos 97 - Bible in Tzotzil de Chenalhó with Deuterocanon

Ja' stuc sventainoj scotol li Diose

¹ Cuxetuc no'ox yo'nton sbejel li banamile; tse'inicuc no'ox li bic'tal banamil cacajtic ta nabe, yu'un ja' Ajvalil stuc li Muc'ul Diose.

² Joyibtabil ta pimil ic'al toc; ja' snacleb smuc'ta chotleb c'otem li c'usi tuc', li c'usi melele.

³ Ja' ba'yucbe oy yu'un li c'oq'ue; ja' chchic' o li yajcontratac te setelique.

⁴ Sacuben banamil yu'un li sacsevuletic yu'une. Li banamile inic ti c'alal laj yile.

⁵ Li vitsetique i'ulic jech chac c'u cha'al chab ta stojol li Muc'ul Diose, ja' li Yajval sbejel banamile.

⁶ Li vinajele chalic ti toj tuc' yo'nton li Muc'ul Diose; li lumetic ta banamile chilbeic li slequilal yutsilale.

⁷ Chyalic ta q'uexlal li boch'otic tscuyic ta Dios li c'usitic loc'tabil no'oxe, ti stoyoj sba xchi'uquic li c'usi cuybil ta diosetique. Scotol li diosetic yu'unique tsquejan sbaic ta stojol li Muc'ul Diose.

⁸ Muc'ul Dios, li Sión xchi'uc li lumetic ta Judae xcuxet no'ox yo'ntonic yu'un li chapanel avu'une.

⁹ Yu'un li vo'ote Muc'ul Dios, ven toyol oyot yu'un scotol li banamile; li vo'ote xjelov to amuc'ul ta scotol li yantic diosetique.

¹⁰ Li Muc'ul Diose ja' tsc'an li boch'o tscontrainic c'usitic chopole; ja' chchabi lec li boch'otic jun yo'ntonic ta stojole; tscolta loq'uel ta sc'ob li chopol cristianoetique.

¹¹ Xojoban luz ta stojol li boch'o tuc' yo'ntone; oy xcuxetel yo'nton li boch'o lecuben xa yo'ntone.

¹² Cuxetuc no'ox avo'ntonic ta stojol Muc'ul Dios; vo'oxuc ti lecubenoxuc xae, albeic slequilal xch'ul bi li Muc'ul Diose.