Salmos 96 - Bible in Tzotzil de Chenalhó with Deuterocanon

Ja' no'ox stuc tsc'an chquich'tic ta muc' li Muc'ul Diose

¹ Jq'uejintatic ach' q'ueoj ta sventa li Muc'ul Diose; q'uejinanic yu'un Muc'ul Dios acotolic jnaclumetic ta sbejel banamil.

² Q'uejintaic li Muc'ul Diose, albeic slequilal; alic batel ta jujun c'ac'al li coltael yu'une.

³ Puquic ta scotol lumetic li slequilale; albeic scotol cristianoetic li muc'tic sq'uelubiltac spasoje.

⁴ Yu'un toj ech'em smuc'ul stuc li Muc'ul Diose; ja' no'ox stuc chich' albel o slequilal; ja' no'ox stuc xi'bil ta scotol li yan diosetique.

⁵ Yu'un li diosetic yu'un jujun lume loc'ometic no'ox; yan li Muc'ul Diose ja' la spas li vinajele.

⁶ Toj ech'em yutsilal slequilal te ta stojol; nojem ta svu'el, ta xojobal li xch'ulnae.

⁷ Albeic slequilal Muc'ul Dios ta jujuchop abiic, ta jujun lum; albeic slequil li svu'el xchi'uc yutsilale.

⁸ Ich'ic ta muc' li Muc'ul Diose yu'un ja' no'ox stuc ich'bil o ta muc'. Ich'beic tal smoton ti c'alal cha'ochic ta yamaq'uil ch'ulna yu'une.

⁹ Ich'ic ta muc' te ta ch'ulna yu'un; sbejel banamil ac'o xi'icuc ta stojol.

¹⁰ Jech xavalic batel ta jujun banamil: “Li Muc'ul Diose ja' muc'ul Ajvalil stuc. Ja' la snacan lec li banamile yu'un jech mu xlom; lec tuc' chchapan scotol li cristianoetique.

¹¹ Vinajel, cuxetuc no'ox avo'nton; banamil, tse'inan no'ox. Vo'etuc no'ox ta baq'uel li nabe xchi'uc scotol li c'usitic te oye.

¹² Cuxetuc no'ox yo'nton li osilaltique xchi'uc li c'usitic te oyique. Aveticuc no'ox ta xcuxetel yo'ntonic li te'etic ta toyolaltique.

¹³ Aveticuc no'ox ta stojol li Muc'ul Dios c'alal ta xtale, yu'un ja' chtal xchapan sbejel li banamile; lec tuc' chchapan, tstusan scotol li jujun lume.