Salmos 95 - Bible in Tzotzil de Chenalhó with Deuterocanon

Q'ueoj sventa yalbel slequilal Dios

¹ La'ic, la' jq'uejintatic Muc'ul Dios ta xcuxetel co'ntontic; la' jq'uejintatic li Jchabivanej, li Jcoltavanej cu'untique.

² La'etcutic no'ox c'alal chij'och batel ta stojol; jq'uejintatic q'ueojetic sventa chquich'tic ta muc'.

³ Yu'un li Muc'ul Diose ja' no'ox stuc ech'em smuc'ul; ja' muc'ta Ajvalil yu'un scotol li yan diosetique.

⁴ Yu'un ja' oy ta sc'ob c'alal to ta yutil li banamile, xchi'uc ja' yu'un scotol li muc'tic toyol vitsetique.

⁵ Ja' yu'un noxtoc li muc'tic nabe yu'un ja' la spas; ja' spasben stuc noxtoc li bats'i banamile.

⁶ La'ic me, la' quich'tic ta muc, la' jpatan jbatic ta stojol, la' jquejan jbatic ta stojol li Muc'ul Diose yu'un ja' la spasutic.

⁷ Yu'un li Diose ja' Dios cu'untic. Li vu'utique steclumal c'otemutic, xchij c'otemutic; te lamalutic ta yaxal jobeltic yu'un. Me chava'yic chasc'opanoxuc Dios li' ta orae:

⁸ “Mu me xatsatsubtas avo'ntonic, jech chac c'u cha'al la spasic te ta Meriba ti c'alal ja'o yorail te oyic ta Masah ta xocol banamile.

⁹ Ja' te la sa'bicun sc'ac'al co'nton li amoltot ayame'ic ta vo'onee; la sq'uelbicun co'nton, ac'o me laj yilic li c'usitic la jpase.

¹⁰ Cha'vinic (40) jabil ilinemun yu'unic li jc'ol cristianoetic ijelovic le'e, jech laj cal: ‘Li cristianoetic le'e, solel yanijem yo'ntonic o; solel mu xotquinic o li lequil be cu'une.

¹¹ Ja' yu'un ta sc'ac'al co'nton jamal laj cal ti j'ech'el mu x'ochic o ti bu caloj chcux yo'ntonique’, xichi”, xi li Diose.