Salmos 94 - Bible in Tzotzil de Chenalhó with Deuterocanon

Ja' jpac-ajvalil stuc li Diose

¹ Muc'ul Dios, vo'ot li jpac-ajvalilote, Dios jpac-ajvalil, ac'o aba ta ilel.

² Ac'o vinajuc amuc'ul, vo'ot li jchapanvanejot ta sbejel banamile; ac'bo xa stojolic li jtoybaetique.

³ Muc'ul Dios, ¿jayib to c'ac'al ta jmalacutic? ¿Jayib to c'ac'al ti stse'inic no'ox li chopol cristianoetique?

⁴ ¿Baq'uin to chlaj yo'ntonic ta yalel li c'usitic chopole? Yu'un li chopol cristianoetic le'e jtoybaetic, stuc no'ox yac'oj sbaic o.

⁵ Uts'il chilic li boch'otic t'ujbil avu'une; chac'beic ep svocol li ateclumale.

⁶ Tsmilic li me'on antsetique xchi'uc li yanlumetique, xchi'uc tsmilic noxtoc li me'on ololetique.

⁷ Jech chalic: “Mu xil li Muc'ul Diose; mu xa'ay li Dios yu'un Jacobe”, xiic.

⁸ A'yo ava'yic, bol cristianoetic, vo'oxuc ti mu c'usi xana'ique, ¿baq'uin to chabijubic?

⁹ ¿Me chacuyic ti mu xa'ay li boch'o la spas jchiquintique? ¿Me chacuyic ti mu xil li boch'o la spas jsatique?

¹⁰ ¿Me chacuyic ti mu'yuc chac'be stojol mulil li boch'o tstaq'ui muc'tic lume? ¿Me chacuyic ti mu sna' li boch'o chac'be sbijil cristianoetique?

¹¹ Li Muc'ul Diose sna'oj c'usitic tsnop li cristianoetique; sna' ti mu'yuc stu o li c'usi tsnopique.

¹² Muc'ul Dios, xcuxet no'ox yo'nton li boch'otic vo'ot chatojobtase, ti chachanubtas ta mantaletic avu'une.

¹³ Yu'un jech jun no'ox yo'nton ti c'alal yorail chtal vocole, ti c'alal ja'o yorail chjoc'bat xch'enal ya'yel li boch'otic chopol yo'ntonique.

¹⁴ Yu'un li vo'ote Muc'ul Dios, mu'yuc chacomtsan li ateclumale; mu'yuc chavicta li boch'otic t'ujbilic avu'une.

¹⁵ Yu'un li chapanele ta xtuq'uib lec; li boch'otic lec ono'ox yo'ntonique ja' tspasic o batel.

¹⁶ ¿Boch'o chlic tal, chtal scoltaun ta stsalel li boch'otic chopolique?

¹⁷ Ti mu'yucuc chiscoltaun li Muc'ul Diose, ta ora no'ox chicham ti jechuque.

¹⁸ C'alal jech laj cale: “Ta xjaxbuj xa cacan”, c'alal xichie, ta sventa slequil avo'nton tal avicoun, Muc'ul Dios.

¹⁹ C'alal ilubtsaj xa jol ta scoj ti toj ep chlo'ilaj co'ntone, vo'ot laj amuq'uibtasbun co'nton; laj avac'bun xcuxetel co'nton.

²⁰ Li vo'ote mu'yuc chaco'lajes avo'nton achi'uc li jchapanvanejetic ti mu tuc'uc chchapanvanique, ti ma'uc tspasic jech chac c'u cha'al chal li mantaletic avu'une,

²¹ ti jmoj tsnopic c'usi tspasbeic li boch'otic tuc' yo'ntone, ti chaq'uic ta milel li boch'o mu'yuc smule.

²² Pero li Muc'ul Diose ja' jpojubbail c'otem o; ja' jnac'ubbail c'otem jech chac c'u cha'al muc'ta tsatsal ton, yu'un ja' jpatoj o co'nton yu'un.

²³ Li Muc'ul Diose ja' chac' joybijuc ta sba stuquic c'usi chopol tspasic li cristianoetique; ta sventa xchopolil stuquic ta xich'ic ulesel o. J'ech'el ta xmilatic o yu'un li Muc'ul Dios cu'untique.