Salmos 92 - Bible in Tzotzil de Chenalhó with Deuterocanon

Sq'uejintabel slequil yo'nton Dios

Q'ueoj sventa sc'ac'alil cuxub o'ntonal.

¹ Muc'ul Dios, vo'ot ti te oyot ta vinajele, toj lec ti chavich' albel alequilale, xchi'uc ti chich' q'uejintael q'ueoj ta aventae.

² Ta jujun sob chcal ti toj lec chac'uxubinvane; ta jujun ac'ubal chcal ti jun avo'nton o ta jtojole.

³ Ta jq'uejintaot ta sonetic ti oy yaq'uile, xchi'uc ta muc'tic arpa, xchi'uc ta yan arpa ti lec no'ox xlamamet xbaq'ue.

⁴ Muc'ul Dios, toj xcuxet no'ox co'nton ta sventa li avabtele; chiyac'bun lec xcuxetel co'nton li c'usitic laj apase.

⁵ Muc'ul Dios, toj muc'tic li abtel laj apase; mu'yuc spajebal li c'usi anopoje.

⁶ Li boch'o mu'yuc sbijilique mu sna'ic; li boch'o bolique mu xa'ibeic o smelol.

⁷ Li boch'otic chopolique ta xch'iic jech chac c'u cha'al ts'i'lal; toj lec chnichin scotol li xchopol abtelique, pero ja' no'ox sventa chich' ch'ayel o sbatel osil.

⁸ Yan li vo'ote Muc'ul Dios, sbatel osil te oyot o ta vinajel.

⁹ Jna'ojcutic ti oy c'usi tstaic li avajcontrataque, yu'un ta ono'ox xich'ic ulesel scotol; ta xich'ic puquel batel scotolic li boch'otic chopolique.

¹⁰ Pero li vu'une chavac'bun lec jtsatsal jech chac c'u cha'al jcot tot vacax, xchi'uc chajaxbun lec aceite ta jol.

¹¹ Ta to xquil c'u x'elan chyalic ta lum li cajcontrataque; ta to xca'ibe c'u x'elan svocolic li boch'otic chopolique.

¹² Li boch'o tuc' yo'ntonique lec chnichinic jech chac c'u cha'al xan; lec chch'iic jech chac c'u cha'al ch'ut te'etic ta Líbano.

¹³ Yu'un xco'laj xchi'uc ts'unbilic ta xch'ulna Muc'ul Dios; te chac' lec xnichic ta yamaq'uil sna li Dios cu'untique.

¹⁴ Ac'o me mol me'elic xa, ta to satinic; lec tsotsic o, lec yoxic o.

¹⁵ Te chalilanic o ti lec tuc' stuc li Muc'ul Diose, ti mu'yuc c'usi chopol oy o ta stojol li jchabivanej cu'une.