Salmos 91 - Bible in Tzotzil de Chenalhó with Deuterocanon

Ja' smacojutic ta yolon sc'ob li Boch'o ech'em svu'ele

¹ Li boch'o chabibil yu'un li Boch'o te oy ta vinajele, ti oy ta xyaxinal li Boch'o ech'em svu'ele,

² jech chal ta stojol li Muc'ul Diose: “Vo'ot jpojubbailot, vo'ot jnac'ubbailot, vo'ot Diosot cu'un, jpatoj o co'nton ta atojol”, xi.

³ Ja' xu' yu'un chascoltaot loq'uel ta xch'ojon li jyacvaneje, xchi'uc ta sventa li jch'amajel chamele.

⁴ Ja' chasmacot ta sc'uc'umal, jech jun avo'nton lec nac'alot o ta yolon xic'. Ja' amac c'otem ti lec jun yo'nton o ta atojole.

⁵ Jech mu xaxi' yu'un li c'usitic tsibtasvan ta ac'ubaltique, xchi'uc li c'usitic chanovic ta ic' ta c'ac'altic jech chac c'u cha'al flechaetique,

⁶ xchi'uc li tsatsal chamel chtal ta ac'ubaltique, xchi'uc li pucujetic tsoquesvan ta o'lol c'ac'ale.

⁷ Jmil (1,000) chamen chyalic ta lum ta ats'etc'ob; lajunmil (10,000) chamen chyalic ta lum ta abats'ic'ob, pero li vo'ote me jutuc mu'yuc c'usi chaspasbot.

⁸ Ja' no'ox chavil lec ta asat atuc c'usi chc'ot ta pasel; chavil chich' stojolic li boch'otic chopolique.

⁹ Yu'un ja' apatoj avo'nton o ti chascoltaot li Muc'ul Diose, xchi'uc laj xa avac' aba o ta sc'ob li Boch'o te oy ta vinajele.

¹⁰ Jech mu'yuc ta xtal ta atojol li c'usi chopole, xchi'uc mu'yuc ch-och chamel ta ana.

¹¹ Ta stacbot tal li yaj'almantaltaque; ja' chaxchabiot ti buyuc no'ox chaxanove.

¹² Ja' chastsacot batel ta sc'obic, jech mu xabosi avacan ta ton.

¹³ Ac'o me te chajelov ti bu oy leonetic xchi'uc jti'val chonetique, ac'o me ch-ech' apech' ta teq'uel li chonbolometic ti toj xi'balic sbae, mu'yuc c'usi xu' chaspasbot.

¹⁴ Jech chal li Diose: “Vu'un ta jcolta loq'uel ta sventa scotol c'usiuc no'ox, yu'un xiyotquinun, xchi'uc vu'un no'ox yich'ojun ta muc'.

¹⁵ C'alal chisc'anbun vocole, ta jtac'be li sc'ope; c'alal oy ep svocole, te ta jchi'in o. Vu'un ta jcolta; ta xcac' ta ich'el ta muc'.

¹⁶ Ta xcac' sc'upinic ti jal chcuxiique; ta xcac'be yilic ti ta jcoltae”, xi li Muc'ul Diose.