Salmos 90 - Bible in Tzotzil de Chenalhó with Deuterocanon

LIBRO IV (Salmos 90—106 ) Sbatel osil te oy o li Diose; yan li cristianoetique j'ech'el beic no'ox

Sc'opanel Dios yu'un Moisés, ja' li yajtunel Diose.

¹ Cajval, vo'ot no'ox mero jnac'ubbailotcutic o ti jayc'ol cristianoetic chjelovic li' ta banamile.

² Ta vo'one c'alal mu'yuc to'ox ch-ayin li vitsetique, c'alal mu'yuc to'ox ch-ayin li banamil xchi'uc li c'usitic oye, vo'ot ono'ox Diosot o; sbatel osil te oyot o.

³ Vo'ot chavac' c'atajuc ta pucuc yan velta li cristianoetic ti c'alal jech chavale: “Cristianoetic, xu' xa chac'atajic ta pucuc”, ti c'alal xachie.

⁴ Yu'un li jmil (1,000) jabile ja' jech chava'ay jech chac c'u cha'al li jun c'ac'al ijelov voljee. Unin muc'ta jal no'ox chava'ay jech chac c'u cha'al li boch'o chbat svayel ta ac'ubaltique.

⁵ Ta ora no'ox chames batel jech chac c'u cha'al yip nojelal uc'um. Ja' no'ox jech chava'ay jech chac c'u cha'al vaychil; ja' no'ox jech chava'ay jech chac c'u cha'al ts'i'lal ti lec chch'ie,

⁶ ti tuquem xa'ox xnich ta sobe, pero ta mal c'ac'al lusiben, taquinic xa'ox.

⁷ Yu'un ta sc'ac'al no'ox avo'nton xu' chilajcutic; ta sc'ac'al no'ox avo'nton xu' chch'ay co'ntoncutic.

⁸ Yu'un mu'yuc macal ta asat li jmulcutique; lec sacjaman aq'ueloj scotol li c'usi mucul jpasojcutique.

⁹ Li corailcutique ta xlaj ta sventa sc'ac'al avo'nton; li jabilalcutique ta ora no'ox chjelov cu'uncutic jech chac c'u cha'al ta jic' co'ntoncutic.

¹⁰ Ja' no'ox lajuneb xchanvinic (70) jabil ti xu' chicuxicutique; li boch'o toj lec tsotsique xu' chc'otic c'alal ta chanvinic (80) jabil, pero toj vocol chca'icutic, yu'un ja' no'ox puru vocol, puru abtel. Li jabilalcutique ta anil no'ox chjelov, jech ech'el libatcutic o.

¹¹ ¿Boch'o xotquin c'u x'elan stsatsal ti c'alal cha'iline? ¿Boch'o sna' c'u yalal li sc'ac'al avo'ntone?

¹² Jech ac'bun lec jna'cutic ti atbil no'ox jayib c'ac'al chijelovcutique; chanubtasuncutic lec, yu'un jech ta xibijubcutic.

¹³ Muc'ul Dios, la' me sutan tal ta jtojolcutic, ¿Me chajalij to ep c'ac'al? La' c'uxubino li avajtuneltac li'i.

¹⁴ C'alal ta jtsaccutic jujun c'ac'ale, nojesuncutic ta c'uxubinel avu'un, jech xcuxet no'ox co'nton chiq'uejincutic avu'un ti jayib c'ac'al cuxuluncutique.

¹⁵ Ac'buncutic ep jabil ti xcuxet no'ox co'ntoncutic jech chac c'u cha'al yepal jabil laj avac'bun jvocolcutique.

¹⁶ Ac'bun quilcutic avabtel vu'uncutic li avajtuneluncutique; ac'bun quilcutic alequilal c'alal ta jmomnich'nabcutic.

¹⁷ Cajval Dios, li' oyuc o ta jtojolcutic li alequilale. J'ech'el lec ac'o comuc o li cabtelcutique; ta melel staoj yav ac'o comuc o li cabtelcutique.