Salmos 9 - Bible in Tzotzil de Chenalhó with Deuterocanon

Stojbel ta vocol Dios ta sventa tuc' chchapanvan

Q'ueoj yu'un David. Laj yich' q'uejintael ta oq'ues xchi'uc ta arpa; ja' la sventain li banquilal yu'un jq'ueojetique.

¹ Muc'ul Dios, ta scotol co'nton chcal alequilal; ta xcal batel c'usitic toj yan yutsil apasoj.

² Stse'in no'ox co'nton, xcuxet no'ox co'nton ta atojol; ta jq'uejinta abi, vo'ot ti te oyot ta vinajele.

³ Li cajcontrataque tsut batel ta sva'lupatic, chyalic ta lum, chch'ayic o batel ta atojol.

⁴ Laj xa avil ti tuc' c'usitic jpasoje; lachoti ta achotleb, lec tuc' laj achapanun.

⁵ Laj ataq'ui li boch'otic mu xayich'icot ta muq'ue; laj asoques li boch'otic chopolique; laj atu'pbe o sc'oplal sbatel osil.

⁶ Li cajcontrae ilajic xa; j'ech'el i'ulic o c'alal ta slumalic. Laj ajines scotol; j'ech'el ich'ay o sc'oplal c'alal ta slumalic.

⁷ Li Muc'ul Diose te oy o sbatel osil. Chapal xa xchotleb sventa chchapanvan.

⁸ Lec tuc' chchapan sbejel banamil; tuc' chalbe c'u x'elan chcom jujun lum.

⁹ Li Muc'ul Diose tspoj li boch'o abul sba ta uts'intaele; tscolta ti c'alal oy at-o'nton cha'yique.

¹⁰ Muc'ul Dios, li boch'otic xayotquinicote ja' no'ox spatoj yo'ntonic ta atojol; me jutuc mu'yuc chacomtsan li boch'otic chasa'icote.

¹¹ Q'uejintaic li Muc'ul Dios ti te tspas mantal ta Sione; puquic batel ta jujun lum li c'usitic lec spasoje.

¹² Li Diose sna'oj li boch'otic oy svocolique; mu xch'ay ta yo'nton ti ep choc'ta sbaique; chac'be stojic li boch'otic ts-uts'intavanique.

¹³ Muc'ul Dios, c'uxubinun me, q'uelavil c'u x'elan jvocol yu'un li boch'otic stsoq'uet yo'ntonic cu'une; loq'uesun ta sventa li lajele,

¹⁴ yu'un jech xu' chcal te ta sti' scoralil Jerusalén ti toj ech'em alequilale, xchi'uc ac'o yilic ti xcuxet no'ox co'nton ta sventa ti laj acoltaune.

¹⁵ Li boch'otic mu'yuquic ta stojol Diose, te ch-ochic yalel ta sjoc'bil ch'en stuquic; te yacbil chc'ot yacan stuquic ta ch'ojon ti yac'ojic ta mucule.

¹⁶ Yu'un ivinaj c'u x'elan sc'oplalic ti c'alal laj yich'ic chapanel yu'un Muc'ul Diose; ta yabtel no'ox stuquic chucul chcomic o li boch'otic chopolique.

¹⁷ Li boch'otic chopolique, ti chch'ay ta yo'ntonic Diose, j'ech'el ch-u'ninatic o yu'un li yavil animaetique.

¹⁸ Yan li boch'otic abul sbaique mu xch'ayatic o ta o'ntonal; mu xch'ay o li c'usi yochelic smalaele.

¹⁹ Muc'ul Dios, la' me coltaun. Mu me xavac' xjelov stoyobbailic li cristianoetique; ac'o ta ilel ti mu'yuc lec c'usi tspasic ta atojol li boch'otic chopolique.

²⁰ Muc'ul Dios, tic'bo xi'el ta yo'ntonic; ac'bo sna'ic ti mu'yuc c'usi xu' yu'unique, yu'un cristianoetic no'ox.