Salmos 89 - Bible in Tzotzil de Chenalhó with Deuterocanon

Li Diose oy c'usi la xchapanic xchi'uc David

Q'ueoj yu'un Etán, ja' li ezra vinique.

¹ Muc'ul Dios, sbatel osil ta jq'uejinta o ti vo'ot jc'uxubinvanejote; jayc'oluc alab nich'nabetic chjelov, te ta xcal o ti toj tuc' avo'ntone.

² Ta xcal ti sbatel osil te oy o li slequil avo'ntone; ti mu sna' xjel o li stuq'uil avo'nton jech chac c'u cha'al vinajel ti mu sna' xjele.

³ C'alal oy c'usi j'ech'el laj achapan achi'uc li boch'o t'ujbil avu'une, ja' li avajtunel Davide, jech laj avalbe ta jamal:

⁴ “Sbatel osil ja' chcac' ochicuc o ta ajvalilal li amomnich'nabe”, xavut.

⁵ Muc'ul Dios, scotol li boch'otic cuxajtic te ta vinajele chalic ac'oplal ti puru melelic xac'opoje, xchi'uc chalic li c'usitic toj labalic sba laj apase.

⁶ Yu'un mu'yuc boch'o yan te ta vinajel ti xaco'laj achi'uque, Muc'ul Dios; mu'yuc boch'o yan ech'em svu'el jech chac c'u cha'al vo'ot.

⁷ Vo'ot Muc'ul Diosot, atuc no'ox xi'bilot; te joyibtabilot yu'un scotol li j'almantaletic te ta vinajele.

⁸ Muc'ul Dios, vo'ot ti chapas ta mantal scotol te ta vinajele, mu'yuc boch'o yan jech chac c'u cha'al vo'ot, yu'un li vo'ote toj ech'em avu'el; te avich'oj o li stuq'uil avo'ntone.

⁹ Vo'ot laj atsal li muc'ta nab c'alal ilic ta tselajetele; vo'ot laj apajes ti c'alal ilic ta yuc'lajetele.

¹⁰ Vo'ot laj atsal, laj amil li smuc'ta chanul nab ti toj xi'bal sbae; ta avu'el atsatsal la spuc sba batel avu'un li avajcontrae.

¹¹ Li vinajel xchi'uc banamile ja' avu'un; vo'ot laj anacan lec li banamil xchi'uc scotol li c'usitic te oye.

¹² Vo'ot laj avac' ac'o oyuc noxtoc li norte xchi'uc sure; li vits Tabor xchi'uc Hermone xcuxet no'ox yo'nton tsq'uejintaic abi.

¹³ Li ste'el ac'obe toj ech'em svu'el; li abats'ic'obe toj tsots, xchi'uc ja' jtsalvanej.

¹⁴ Li snacleb achotlebe ja' li stuq'uil avo'ntone xchi'uc li tuq'uil chapanel avu'une. Li c'uxubinel xchi'uc li c'usitic melel avu'une ba'yucbe chbat ta stuq'uil asat scotol.

¹⁵ Muc'ul Dios, xcuxet no'ox yo'nton li boch'otic sna'ic yalel alequilale; ja' chanovic ta saquil osil avu'un.

¹⁶ Vo'ot no'ox ta aventa ti xcuxet no'ox yo'ntonic scotol c'ac'ale; ta sventa no'ox stuq'uil avo'nton ti mu'yuc xa c'usi staoj cha'yic oe.

¹⁷ Ta melel vo'ot ta aventa ti lec sc'oplalique, ti staoj lec stsatsalique; ta sventa slequil avo'nton ti ch-epaj jtsatsalcutique.

¹⁸ Li jmacubbailtique ja' li Muc'ul Diose, Li Ajvalil cu'untique ja' li Muc'ul Dios yu'un Israele.

¹⁹ Muc'ul Dios, oy bu laj ac'opan ta xvayech li avu'untac ti tuc' yo'ntonique, jech laj avalbe: “Laj xa jt'uj jun boch'o mu sna' xi' te ta stojol li jteclumale; laj xa jtoy muyel, xchi'uc jcoltaoj xa.

²⁰ La jta ta sa'el li David, ja' li cajtunele; laj yich' yabtel ta ajvalilal ta sventa li ch'ul aceite cu'une.

²¹ Scotol c'ac'al ta jcolta o; chcac'be lec stsatsal ta sventa jvu'el.

²² Mu xcac' macatuc yu'un li yajcontrataque; mu xcac' tsalatuc yu'un li boch'otic chopolique.

²³ Te sq'ueloj ta jpech'be ta teq'uel li yajcontrataque; ta jtsalbe o ta j'ech'el li boch'otic stsoq'uet yo'ntonic ta stojole.

²⁴ Li c'usitic melel xchi'uc li c'uxubinel cu'une te chcom o ta stojol; vu'un ta jventa ti ch-ayin lec stsatsale.

²⁵ Ta xcac'be sventain scotol ti xlic ta muc'ta Nab Mediterráneo c'alal to ta uc'um Eufratese.

²⁶ Jech chlic yalbun: ‘Vo'ot jtotot, vo'ot Diosot cu'un; vo'ot tsatsal tonot, vo'ot jcoltavanejot’, xi chlic yal ta jtojol.

²⁷ Jech ec li vu'une ta xcac' c'otuc ta ba nich'onil; ta xcac' muq'uibuc sc'oplal ta scotol ajvaliletic ta yantic banamil.

²⁸ J'ech'el mu'yuc ta xlaj sc'oplal o ti ta jc'uxubine; j'ech'el te chcom o li c'usi jchapanoj jchi'uque.

²⁹ Ti c'u yepal c'ac'al te to oy li vinajele, ja' chac' ochilanicuc o ta xq'uexol li smomnich'nabtaque.

³⁰ Pero me tscomtsanbicun xch'unel jmantaltac li smomnich'nabtaque, me mu spasic c'usi chal li chanubtaseletic cu'une,

³¹ me tsoquesbeic sc'oplal li mantaletic caloje, me mu ja'uc chch'unic c'usi chal li jmantale,

³² ta xcac'be stoj smul ta scoj li stoyobbailique; ta xcac'be nucul ta scoj li sbolilique.

³³ Pero mu'yuc ta jcomtsan o xc'uxubinel li Davide; mu'yuc ta jsutes o jc'op ta stojol.

³⁴ Mu'yuc ta jtuch' o li c'usi jchapanoje; mu'yuc ta jsutes li jc'ope.

³⁵ Yu'un j'ech'el jamal laj cal o ta sventa ti ch'ul Diosune; muc jeche'uc ta xquepalc'opta li Davide.

³⁶ Ti c'u to sjalil te oy li c'ac'ale, j'ech'el ja' ch-ochilanic o ta ajvalilal li smomnich'nabtaque.

³⁷ J'ech'el te chcomic o jech chac c'u cha'al u; j'ech'el mu xtuch' o yabtelic ti c'alal te to oy li vinajele”, xachi.

³⁸ Pero li vo'ote laj abaj, laj ajip, laj avilinta li ajvalil at'ujoje.

³⁹ Laj atuch' li c'usi achapanoj achi'uc avajtunele; laj ajipbe yalel ta banamil li scoronae.

⁴⁰ Laj avoman ochel beetic ta coraltonetic yu'un; laj ajinesbe o li lumetic yu'une.

⁴¹ Scotol li cristianoetic te chjelovique chelc'anic batel li c'usitic oye; ta xa xna'leat yu'un li boch'otic nopol nacal xchi'uque.

⁴² Laj xa avac' stoy sc'obic ta stojol li yajcontrataque; laj avac' ti xcuxet no'ox yo'ntonique.

⁴³ Laj alajesbe ye ta jech no'ox li yespadae; muc xa xacolta ta sventa muc'ta c'op.

⁴⁴ Laj atu'pbe li slequilal yutsilale; laj ajipbe ta lum li xchotleb sventa ajvalilale.

⁴⁵ Laj acomajesbe li yoraile; laj avac' yaluc o ta q'uexlal.

⁴⁶ Muc'ul Dios, ¿jayib to c'ac'al ti jech chanac' abae? ¿Me j'ech'el tsanem o jech chac c'u cha'al c'oc' li sc'ac'al avo'ntone?

⁴⁷ Muc'ul Dios, na'o me ti jayib no'ox c'ac'al cuxulune; li cristianoetic ti vo'ot laj apase mu epuc c'ac'al chcuxiic.

⁴⁸ Mu'yuc boch'o ti te cuxul o ti mu sna' xchame. Mu'yuc boch'o xu' yu'un tscolta sba loq'uel ta sventa li lajele.

⁴⁹ Cajval, ¿bu oy li c'uxubinel ono'ox avu'un ta vo'one ti jun avo'nton jamal laj avalbe li David ti chavac'bee?

⁵⁰ Cajval, na'bo me svocolic ta uts'intael li avajtuneltaque; ep boch'otic chiyilbajinuncutic, mu xch'ay o ta co'nton.

⁵¹ Muc'ul Dios, ep chiyilbajinuncutic li avajcontrae; ep chna'leat li ajvalil at'ujoje.

⁵² Ac'o ich'atuc ta muc' sbatel osil li Muc'ul Diose. Jech ac'o c'otuc ta pasel. Jechuc.