Salmos 88 - Bible in Tzotzil de Chenalhó with Deuterocanon

Sc'anel vocol ta stojol Dios

Q'ueoj yu'un xnich'nab Coré. Ja' la sventain li banquilal yu'un jq'ueojetique, ja' li Hemán ezra vinique. Li q'ueoje ja' sventa chamel, xchi'uc sventa vocol.

¹ Muc'ul Dios, Jcoltavanej cu'un, ta c'ac'al ta ac'ubal xivocolet ta atojol.

² A'ibun me, tsacbun me li jc'ope; ac'o c'otuc ta atojol li c'usi chajc'anbote.

³ Yu'un ista xa co'nton yu'un li vocole; po'ot xa chibat ta yavil animaetic chca'ay.

⁴ Xu' xa chquich' tsaquel ta atel jchi'uc li boch'otic chamenique, yu'un mu'yuc xa jtsatsal o chca'ay.

⁵ Laj xa quich' aq'uel ta stojol li boch'otic chamenique, ja' xa jechun jech chac c'u cha'al boch'o ta xa xich' muquele; ja' xa jechun jech chac c'u cha'al li boch'o ach'ayoj o ta avo'ntone, ti aloq'uesoj xa o ta ac'obe.

⁶ Laj xa avac'un yalel ta natil ch'en ti toj ic' yut xchi'uc ti toj nate.

⁷ Li' xa jcuchoj o li sc'ac'al avo'ntone; laj xa svuts'q'uinun yalel li tsatsal vo' laj avac' yalel tale.

⁸ Laj xa avac' scomtsanicun li boch'otic lec ono'ox jc'opanique, solel mu'yuc xa jtu ta satic avu'un; lec macalun o, mu xa xu' chicol loq'uel.

⁹ Xmaclajet xa jsat ta scoj ti toj ep chi'oq'ue, yu'un scotol c'ac'al xi'oc'olet ta atojol; xbechet jc'ob ta atojol, Muc'ul Dios.

¹⁰ ¿Me yu'un ja' xu' chavac' ta ilel avu'el ta stojol li animaetique? ¿Me yu'un ja' xu' chalic alequilal li boch'otic chamenique?

¹¹ ¿Me yu'un xu' to chich' alel te ta muquinaltic li c'uxubinel avu'une? ¿Me yu'un xu' to chich' alel te ta yavil lajel li c'usitic melel avu'une?

¹² ¿Me yu'un xu' to chich' otquinel te ta ic' osil li sq'uelubiltac atsatsale? ¿Me yu'un xu' to chich' ilel stuq'uil avo'nton te ti bu chch'ay o ta o'ntonal scotole?

¹³ Pero li vu'une, Muc'ul Dios, vo'ot ta jc'anbot vocol ta atojol; ta jujun sob chajc'opanot.

¹⁴ Pero ¿c'u yu'un ti chabajune, Muc'ul Dios? ¿C'u yu'un ti chanac' asat ta jtojole?

¹⁵ Ta jqueremal ono'ox toj ep jvocol, jutuc mu chicham; scotol ono'ox ora chvul ta jba li c'usi toj xi'balic sba chavac'bun tale. Mu xa xcuch cu'un chca'ay.

¹⁶ Ijelov xa ta jba scotol li sc'ac'al avo'ntone; laj xa stsalun li c'usi toj xi'balic sba laj avac'bun tale.

¹⁷ Scotol ora li' sjoyibtaojun jech chac c'u cha'al vo'; laj xa smacun o ta joyob.

¹⁸ Laj xa avac' scomtsanicun li jchi'iltaque xchi'uc li boch'otic lec jc'opan jba jchi'uque; ja' xa jchi'iltac ic'ot avu'un li ic' osile.