Salmos 86 - Bible in Tzotzil de Chenalhó with Deuterocanon

La sc'an coltael ta stojol Dios li Davide

Sc'opanel Dios yu'un David.

¹ Muc'ul Dios, a'ibun li jc'ope, yu'un toj ep chcat co'nton, toj abul jba.

² Chabiun me, yu'un jun co'nton ta atojol. Dios cu'un, coltaun me, vu'un li avajtunelune, yu'un vo'ot no'ox jpatoj co'nton o ta atojol.

³ Muc'ul Dios, c'uxubinun me, yu'un scotol c'ac'al vo'ot xivocolet ta atojol.

⁴ Ac'bun xcuxetel co'nton, vu'un li avajtunelune, yu'un vo'ot no'ox chajtaot ta na'el.

⁵ Yu'un li vo'ote, Cajval, toj lec avo'nton, ep ts'icumal avu'un; toj ep c'ux ta avo'nton li boch'otic tsc'anic vocol ta atojole.

⁶ Muc'ul Dios, a'ibun me li jc'ope; tuc'ulanbun ti xivocolet ta atojole.

⁷ Yu'un ti c'alal oy jvocole, vo'ot no'ox chajc'opanot, yu'un jna'oj ti chatac'bun li jc'ope.

⁸ Cajval, mu'yuc boch'o yan dios jech chac c'u cha'al vo'ot; mu'yuc boch'o yan jech yabtel jech chac c'u cha'al avabtel li vo'ote.

⁹ Scotol li yajvaltac jujun muc'tiquil lum laj apase ta xlic talicuc ta atojol; chayich'icot ta muc', ta xalic alequilal, Cajval.

¹⁰ Yu'un vo'ot toj ech'em amuc'ul, xchi'uc toj labalic sba c'usi chapas; vo'ot no'ox atuc jech Diosot.

¹¹ Muc'ul Dios, ac'bun lec quil li be avu'une, yu'un ja' no'ox ta jc'an ta jtam batel. Ac'bun ta co'nton ti vo'ot no'ox xu' chaquich'ot o ta muq'ue.

¹² Muc'ul Dios cu'un, scotol co'nton ta xcal alequilal; sbatel osil chaquich'ot o ta muc'.

¹³ Yu'un toj ep xc'uxul avo'nton ta jtojol, yu'un laj acoltaun loq'uel ta sventa ti jech muc xi'och ta yavil animaetique.

¹⁴ Dios cu'un, la scontrainicun li jtoybaetique, ja' li boch'otic mu xayich'icot ta muq'ue. La xchapanic ti tsc'an chiyuts'intaicune; la sa'icun yu'un tsc'an chismilicun.

¹⁵ Pero li vo'ote Cajval, Dios cu'un, atalel jc'uxubinvanejot, toj lec avo'nton, toj c'unc'un chlic sc'ac'al avo'nton; ja' toj muc' li c'uxubinel avu'une, xchi'uc puru melelic li ac'ope.

¹⁶ Q'uelun me, c'uxubinun me; chabiun me, ac'bun tal atsatsal, vu'un li avajtunelune.

¹⁷ Ac'o ta ilel senyail ti c'uxun ta avo'ntone, yu'un jech ac'o yilic li boch'otic chopol yo'ntonic ta jtojole, jech ac'o yalicuc o ta q'uexlal, yu'un vo'ot no'ox laj acoltaun, xchi'uc laj amuq'uibtasbun co'nton.