Salmos 85 - Bible in Tzotzil de Chenalhó with Deuterocanon

Sc'opanel Dios ta sventa israeletic

Q'ueoj yu'un xnich'nab Coré. Ja' la sventain li banquilal yu'un jq'ueojetique.

¹ Muc'ul Dios, toj lec li c'usi laj apas li' ta banamil avu'une; laj avac'be yan velta slequilal li Jacobe.

² Laj apasbe perdón yu'un smulic li ateclumale; laj atu'pbe scotol ti c'u yepal smul staojique.

³ Laj ajip loq'uel scotol li sc'ac'al avo'ntone; laj aten batel li soquemal ajole.

⁴ Dios, jcoltavanej cu'un, cha'toyuncutic xa liquel yan velta; ac'o xa lecubuc avo'nton ta jtojolcutic.

⁵ ¿Me yu'un j'ech'el la'ilin o ta jtojolcutic? ¿Me chavac'be xcuch o comel sc'ac'al avo'nton ti jayc'ol jmomnich'nabcutic chjelovic li' ta banamile?

⁶ Ac'bun xa jcuxlejalcutic yan velta, yu'un jech xcuxet no'ox yo'ntonic ta atojol li ateclumale.

⁷ Muc'ul Dios, ac'bun quilcutic li slequil avo'ntone; ac'buncutic tal li coltael avu'une.

⁸ Ta xca'ay c'usi chal li Muc'ul Diose, yu'un ja' ta xal ti ac'o pasuc ta jun yo'nton li steclumale, ja' li boch'otic tuc' yo'ntonique, yu'un jech mu xa spasic yan velta li xchuvajolilique.

⁹ Ta melel nopol oy coltael yu'un Dios ta stojol li boch'o chich'ic ta muq'ue; li slequilal yutsilale, li' oy ta cosilaltic.

¹⁰ Li c'uxubinel xchi'uc li c'usi melele laj xa snup sbaic; li tuc' o'ntonal xchi'uc li jun o'ntonale laj xa sts'uts' sbaic.

¹¹ Li c'usi melele ich'i xa muyel li' ta banamil; iyal xa tal ta vinajel li stuq'uil yo'nton Diose.

¹² Li Muc'ul Diose ja' ta xac' tal li vo'e, jech lec ta xac' li c'usi ta jts'untic ta cosiltique.

¹³ Li c'usi tuq'ue ja' ba'yucbe chbat yu'un li Muc'ul Diose; ja' ta xchapanic lec batel li bee.