Salmos 84 - Bible in Tzotzil de Chenalhó with Deuterocanon

Toj jun yutsil li xch'ulna Diose

Q'ueoj yu'un xnich'nabtac Coré. La sq'uejintaic ta arpa. Ja' la sventain li banquilal yu'un jq'ueojetique.

¹ Muc'ul Dios, vo'ot ti chapas ta mantal scotol li vinajele, toj jun yutsil li ch'ulna avu'une.

² Toj juteb co'nton chac te oyucun ca'ay ta ch'ulna avu'un; li co'nton xchi'uc jbec'tale chq'uejin no'ox ta atojol, cuxul Dios.

³ Muc'ul Dios, vo'ot ti chapas ta mantal scotol li vinajele, Ajvalil cu'un, Dios cu'un, li bic'tal mute xchi'uc li xaval-eq'uenetique staojic lec snaic; spasoj lec stasic te ta scajleb amoton ti bu xu' tsvoq'ues yolique.

⁴ Toj xcuxet no'ox yo'nton li boch'otic te nacalic ta ch'ulna avu'une; sbatel osil te chayich'icot o ta muc'.

⁵ Xcuxet no'ox yo'nton li boch'o ja' no'ox te staoj o stsatsal ta atojole, ti scotol yo'nton tsc'an chmuy batel ta ch'ulna avu'une.

⁶ C'alal chjelov ta soplejaltic ta sloq'uem ya'lel satile, ta xc'ataj ta nio' yu'un; xco'laj xchi'uc yorail vo'olaltic chc'ot, ts'anajtic ta buyuc no'ox.

⁷ Ja' jech tstailanic o batel stsatsalic ti c'alal chanovic batele; te chc'ot yilic li Dios te ta Sione.

⁸ Muc'ul Dios, vo'ot ti chapas ta mantal scotol te ta vinajele, a'ibun li jc'ope; vo'ot li Diosot yu'un Jacobe, a'ibun li ca'yeje.

⁹ Dios cu'un, vo'ot li jmacubbailote, q'uelo me lec li boch'o at'ujoje; mu me xach'ay asat ta stojol.

¹⁰ Ac'o me jun no'ox c'ac'al te chinaqui ta xch'ulna li Diose, ja' toj ech'em yutsil; ac'o me jmil (1,000) c'ac'al chinaqui ta buyuc no'ox, mu sta jech yutsil. Ac'o me ja' no'ox ta jchabi ti'na te ta ch'ulna yu'une, ja' bal to; ja' altic me ja' chinaqui ti bu toj chopole.

¹¹ Yu'un li Muc'ul Diose ja' xa te xojoban o ta jtojol, ja' jmacubbail c'otem; puru utsilal, puru c'uxubinel xa chiyac'bun. Li boch'otic tuc' yo'ntonique mu'yuc chjalanbatic o li c'usitic leque.

¹² Muc'ul Dios, vo'ot ti chapas ta mantal scotol te ta vinajele, toj jun no'ox yutsil li boch'otic snabanoj sbaic o ta atojole.