Salmos 83 - Bible in Tzotzil de Chenalhó with Deuterocanon

La sc'anic coltael ta stsalel yajcontraic

Q'ueoj yu'un Asaf.

¹ Dios cu'un, mu me teuc no'ox ch'an xachi; mu me teuc no'ox mu xabac', mu xac'opoj.

² Yu'un li avajcontrae li' me stsoq'uet yo'ntonic ta atojol; li' ta stoy sbaic ta atojol li boch'o chopol chayilicote.

³ Oy xa c'usi la xchapanic ta mucul ta sventa sbijilic, yu'un tscontrainic li ateclumale, ja' li boch'otic chabibilic avu'une.

⁴ Laj yalic ti tsc'an chiyulesuncutic oe, yu'un jech mu me xic'otcutic ta jun muc'ta lum, yu'un jech ac'o ch'ayuc o sc'oplal li israeletique.

⁵ Laj xa xchapan lec sc'opic sventa chascontrainicot; laj xa spas sbaic lec ta jmoj scotolic.

⁶ Li edometique, li ismaeletique, ja' li syal'alabtac Agare xchi'uc li moabetique,

⁷ li gebaletique, li amonetique, li amalequetique, li filistaetique, xchi'uc li boch'otic te nacajtic ta Tiroe,

⁸ xchi'uc li asiriaetique jmoj xa la syom sba scotolic; ja' mero stsatsal yo'ntonic ic'ot li Moab xchi'uc Amone, ja' li smomnich'nab Lote.

⁹ Ja' lec pasbo jech chac c'u cha'al laj apasbe li Madiane, pasbo jech chac c'u cha'al laj apasbe ta bevo' Cisón li Sísara xchi'uc Jabine,

¹⁰ ti te ilajic o ta Endore, ti itun ta sventa xyaxal banamil li sbec'talique.

¹¹ Ja' jech xapasbe li jpasmantaletic yu'unic jech chac c'u cha'al laj apasbe li Oreb xchi'uc Zeebe; ja' jech chapasbe noxtoc li banquilaletic yu'unic jech chac c'u cha'al laj apasbe li Zeba xchi'uc Zalmunae.

¹² Yu'un jech chalic: “Vu'utic ta jpojtic li sve'ub xchijtac Diose”, xiic.

¹³ Dios cu'un, ac'o cuchaticuc batel ta sutub ic', ac'o c'oticuc jech chac c'u cha'al jobel ti chbat ta iq'ue.

¹⁴ Ac'o lajicuc o jech chac c'u cha'al vits ti chlaj ta c'oq'ue, jech chac c'u cha'al te'etic ti chlaj ta yat c'oq'ue.

¹⁵ Nutso o batel ta chauquil ic'al vo' avu'un; sibtaso batel ta sutub ic' avu'un.

¹⁶ Ac'o yalicuc o ta q'uexlal, yu'un jech xu' chlic yotquinicot ti vo'ot Muc'ul Diosote.

¹⁷ J'ech'el ac'o yalicuc o ta q'uexlal, j'ech'el tsalbil ac'o comicuc o; mu'yuc stu ac'o comicuc, ac'o ch'ayicuc o ta j'ech'el.

¹⁸ Yu'un jech ac'o yotquinic ti vo'ot no'ox atuc Muc'ul Diosote, ti vo'ot no'ox atuc te oyot ta vinajele, ti oy ta ac'ob scotol li banamile.