Salmos 81 - Bible in Tzotzil de Chenalhó with Deuterocanon

Ac'o me icoltaatic yu'un Dios li israeletique pero la stoy sbaic ta stojol

Q'ueoj yu'un Asaf. La sq'uejintaic ta arpa; ja' la sventain li banquilal yu'un jq'ueojetique.

¹ Cuxetuc no'ox avo'ntonic q'uejinanic yu'un li Diose, yu'un ja' no'ox stsatsal co'ntontic; albeic slequilal li Dios yu'un Jacobe, avetanic no'ox ta xcuxetel avo'ntonic.

² Q'uejintaic ta q'ueojetic; tijic li chac'chac' taq'uinetique, li bic'tal arpae, xchi'uc li muc'tic arpaetique.

³ Jupano avoq'uesic ti c'alal mucul ue, xchi'uc ti c'alal sepet ue, yu'un ja' sc'ac'alil li q'uin cu'untique.

⁴ Yu'un ja' jech mantal quich'ojtic vu'utic li israelutique; ja' jech yaloj mantal li Dios yu'un Jacobe.

⁵ Ja' jech mantal i'albat li José c'alal iloq'uic tal ta yosilal Egiptoe. Laj ca'ay oy boch'o ic'opoj, pero muc jna' boch'o. Jech laj yal:

⁶ “Vu'un la jloq'ues li avicats acajanoj ta anecubique; la jxocobtas li ac'obic ti toj tsots yabtele.

⁷ Laj ac'anbun vocol ti c'alal toj ep avocole, jech vu'un la jcoltaot. La jtac'bot tal ac'op ta chauquetic te ta toquetic; la jq'uelbot c'u x'elan avo'nton ta jtojol te ta vo'etic ta Meriba.

⁸ Vo'oxuc jteclumal, a'ibicun li jc'ope; israeletic a'ibicun li jc'ope.

⁹ Mu me oyuc yan diosetic te ta atojolic; mu me xaquejan abaic ta stojol li diosetic yu'un yan lumetique.

¹⁰ Yu'un vu'un Muc'ul Diosun avu'unic ti la jloq'uesoxuc tal ta Egipto banamile; jach'o li aveique, vu'un ta jnojesboxuc.

¹¹ “Pero li jteclumale muc xiya'ibicun li jc'ope; li israeletique muc xiyich'icun ta muc'.

¹² Ja' yu'un la jcomtsanic ta sventa ti toj tsots yo'ntonique, yu'un ja' la spas c'usi lec cha'ay stuquic.

¹³ Ti lajuc ya'ibicun jc'op li jteclumale, ti ja'uc la stamic batel be cu'un li israeletique,

¹⁴ ta jliquel no'ox la jtsalbe yajcontraic ti jechuque; laj xa cac'be stojic ti jechuque”, xi.

¹⁵ Li boch'otic chopol chilic Muc'ul Diose ta xyalic ta lum ta scoj xi'el; sbatel osil chbat stoj smulic o.

¹⁶ Yan li steclumal Diose ta smac'lin ta lequil trigo; ta snojesbe lec xch'utic ta pom ti chloc' ta ch'entique.