Salmos 80 - Bible in Tzotzil de Chenalhó with Deuterocanon

Sc'anel vocol ta sventa israeletic

Q'ueoj yu'un Asaf. Ja' la sventain li banquilal yu'un jq'ueojetique.

¹ Jchabichij yu'un Israel, a'ibun li ca'yeje, vo'ot ti chachabibe li sts'unubal José jech chac c'u cha'al chije, vo'ot ti te nacalot ta o'lol yu'unic li chib querubinetique,, ac'o tal li axojobale.

² Coltao ta sventa atsatsal li sts'unubal Efraín, Benjamín, xchi'uc Manasese; la' me coltauncutic.

³ Dios cu'un, cha'toyuncutic xa liquel yan velta; ac'o tal xojobal asat ta jtojolcutic, jech colem chicomcutic.

⁴ Muc'ul Dios, vo'ot ti chapas ta mantal scotol te ta vinajele, ¿jayib to c'ac'al ilinemot ti jech mu xatsacbe sc'op li ateclumale?

⁵ Yu'un laj xa avac' jve'elincutic o li ya'lel jsatcutique; laj xa avac' cuch'cutic ep li ya'lel jsatcutique.

⁶ Laj xa avac' sna'leuncutic li boch'o jts'aquinojan jba jchi'uccutique; laj xa avac' stse'intauncutic li cajcontracutique.

⁷ Dios cu'un, vo'ot ti chapas ta mantal scotol te ta vinajele, cha'toyuncutic xa liquel yan velta; ac'o tal xojobal asat ta jtojolcutic, jech colem chicomcutic.

⁸ Yu'un vo'ot laj avich' tal li jtec' ts'usub te ta Egiptoe; laj anuts loq'uel li yantic lume, ja' te laj ats'un li ts'unubil laj avich' tale.

⁹ Laj ach'uba lec li banamil sventa ats'usube. Li ts'usube i'ayin lec yibel; inoj xa lec yu'un li banamile.

¹⁰ Imac xa ta xyaxinal li joljol vitsetique; imac xa ta yanal li muc'tic ch'ut te'etique.

¹¹ Ich'i xa lec batel li sc'obc'obe, ic'ot xa c'alal ta nab; ic'ot xa c'alal ta uc'um Éufrates li sq'uelumtaque.

¹² ¿C'u yu'un ti laj ajinesbe li scoralile, yu'un ta sbulic li boch'otic chjelovic batel ta bee?

¹³ Ta slilinic li vomolchitometique; ta slo'ic li chonbolometique.

¹⁴ Dios cu'un, vo'ot ti chapas ta mantal scotol te ta vinajele, avocoluc la' sutan tal, q'uelo yalel tal te ta vinajel; tuc'ulano lec avil li ts'usubtic avu'une,

¹⁵ ja' li sts'unben abats'ic'obe xchi'uc li sq'uelumtac ti vo'ot laj avac' ch'iuque.

¹⁶ Yu'un chic'bil xa ta c'oc', yav xa li' oye; ac'o chamicuc ta sc'ac'al asat li cajcontracutique.

¹⁷ Ja' ac'o tal ac'ob ta stojol li boch'o oy ta abats'ic'obe, xchi'uc ta stojol li boch'o vo'ot laj avac' ch'iuque,

¹⁸ yu'un jech mu xa xinamajcutic ta atojol. Ac'bun xa jcuxlejalcutic; vo'ot no'ox ta jc'ancutic vocol ta atojol.

¹⁹ Muc'ul Dios, vo'ot ti chapas ta mantal scotol te ta vinajele, cha'toyuncutic xa liquel yan velta; ac'o tal xojobal asat ta jtojolcutic, jech colem chicomcutic.