Salmos 8 - Bible in Tzotzil de Chenalhó with Deuterocanon

Sc'oplal smuc'ul Dios xchi'uc slequilal cristianoetic

Q'ueoj yu'un David. La sq'uejintaic ta arpa; ja' la sventain li banquilal yu'un jq'ueojetique.

¹ Muc'ul Dios, vo'ot Cajvalotcutic, toj ech'em amuc'ul ta sbejel banamil. Apucoj batel alequilal c'alal to ta sjelovel vinajel.

² Ta sventa sc'op bic'tal ololetic xchi'uc boch'o ta to xchu'unic, itsatsub o lec avo'nton ta sventa li avajcontrataque, yu'un jech ac'o macuc yeic, jech tsalbil chcomic o.

³ C'alal ta jq'uel li vinajel ti ja' yabtel avoc ac'obe, xchi'uc li u, li c'analetic apasoje,

⁴ jech chcal ta co'nton: ¿C'usi stu li cristianoetic ti tsta ta na'ele? ¿C'usi xu' yu'un li cristiano ti tsots sc'oplal cha'ye?

⁵ Yu'un jutuc xa no'ox biq'uit laj acomtsan jech chac c'u cha'al li j'almantaletique. Laj avac'be yabtel; laj avac' ti ich'bilic ta muq'ue.

⁶ Laj avac'be sventain scotol li c'usitic apasoje; laj avac'be spas ta mantal scotol:

⁷ vacaxetic, chijetic, chonbolometic ta te'tic,

⁸ mutetic ta toyol, choyetic ta nab, xchi'uc scotol c'usitic oy ta muc'tic nab.

⁹ Muc'ul Dios, vo'ot Cajvalotcutic, toj ech'em amuc'ul ta sbejel banamil.