Salmos 79 - Bible in Tzotzil de Chenalhó with Deuterocanon

Ep at-o'nton laj ya'yic ti c'alal laj yich' jinesel lum Jerusalene

Q'ueoj yu'un Asaf.

¹ Dios cu'un, li yantic lumetique laj xa spojic li c'usitic ja' avu'une; laj xa sbolibtasic li ch'ulna avu'une. Solel puru ton xa li' busul icom yu'unic ta yav li lum Jerusalene.

² Laj xa yac'beic sti' xulemetic li sbec'tal avajtuneltaque; laj xa yac'beic sti' chonbolometic li sbec'tal avu'untaque.

³ Laj xa smalbeic xch'ich'al li' ta spat xocon li lum Jerusalene; ibein batel jech chac c'u cha'al chbein batel vo'; mu'yuc boch'o la smucbeic li sbec'talique.

⁴ Solel na'lebiluncutic xa o yu'unic li boch'o jts'aquinojan jba jchi'uccutique; stse'inic no'ox ta jtojolcutic li boch'otic li' nacajtic ta jpat jxoconcutique.

⁵ Muc'ul Dios, ¿baq'uin to chacoltauncutic? ¿Me yu'un j'ech'el la'ilin o ta jtojolcutic? ¿Me solel tsanem o jech chac c'u cha'al c'oc' li sc'ac'al avo'ntone?

⁶ Ja' te xaloq'ues sc'ac'al avo'nton ta stojol li yantic lumetic ti mu xayich'icot ta muq'ue, xchi'uc ta stojol li ajvaliletic ti mu'yuc tsc'anic vocol ta atojole.

⁷ Yu'un ja' laj yulesic li sts'unubal Jacobe; solel yav xa la scomtsanic li jlumalcutique.

⁸ Mu me ja'uc xavac'bun jcuchcutic li smul jmoltot jyame'cutic ta vo'onee; ac'o taluc ta ora ta jtojolcutic li c'uxubinel avu'une, yu'un solel tsalbiluncutic xa o.

⁹ Coltauncutic me, Dios cu'un, jcoltavanej cu'un, pasbuncutic perdón yu'un li jmulcutique; coltauncutic ta sventa yutsil avo'nton, xchi'uc ta sventa lec chbat ac'oplal.

¹⁰ Mu me jechuc xalic ta jtojolcutic li yanlum cristianoetique: “¿Bu oy li Dios yu'unique?”, mu me xiicuc. Ac'bun quilcutic ti chapacbe sutel sc'oplalic li avajtuneltac ti la smal xch'ich'alique, yu'un jech ac'o yilic li yanlum cristianoetique.

¹¹ A'ibo yoq'uel yavanelic li jchuqueletique; chabio ta sventa avu'el atsatsal li boch'otic chapanbil xa chich'ic milele.

¹² Muc'ul Dios, pacbo sutel vucub velta li boch'o li' nopol nacalique, yu'un toj ep la xchopolc'optaicot.

¹³ Yan li vu'uncutique avu'ununcutic, achijuncutic c'otem, ta jtojbotcutic ta vocol sbatel osil; ta jq'uejintacutic o alequilal sbatel osil xchi'uc li calab jnich'nabcutic ti jayc'ol chjelovic li' ta banamile.