Salmos 78 - Bible in Tzotzil de Chenalhó with Deuterocanon

Sc'oplal c'u x'elan la scolta israeletic li Diose

Q'ueoj yu'un Asaf.

¹ Jteclumal, a'yo ava'yic li mantaletic cu'une; tuc'ulano lec ava'yic li c'usi chloc' ta quee.

² Ta puru lo'il c'op chic'opoj. Ja' ta xcal li c'usi mu'yuc ono'ox vinajem ta vo'onee.

³ Ja' li c'usi ca'yojtic, jna'ojtic ono'oxe, yu'un laj ono'ox yal ca'itic li jmoltot jyame'tic ta vo'onee.

⁴ Ja' tsc'an mu me jmucbetic ec li calab jnich'nabtique; calbetic ya'yic slequilal Muc'ul Dios li alab nich'nabetic ta to xtalique, xchi'uc calbetic ya'yic c'u x'elan li stsatsal svu'ele xchi'uc li muc'tic sq'uelubil la spase.

⁵ Li Diose laj yac' mantaletic ta stojol li Jacobe; laj yac' chanubtaseletic ta stojol li Israele. Laj yalbe jtotic jme'tic ta vo'one ti ac'o xchanubtasic ec li yalab xnich'nabique.

⁶ Yu'un jech ac'o sna'ic ec li jayc'ol alab nich'nabetic ta to xjelovique, ti ts'acal to ta xlic voq'uicuque; ts'acal ja' xa chlic yalbe ya'yic ec li yalab xnich'nabique.

⁷ Yu'un jech xu' chlic yac' yo'ntonic ta stojol li Diose, jech mu xch'ay ta yo'ntonic c'u x'elan yabtel li Diose, jech xu' ta xch'unbeic o li smantaltaque.

⁸ Jech mu xchanic jech chac c'u cha'al li smoltot syame'ic ta vo'one, ti jtoybaetic, ti jbajmantaletique, ti muc scotoluc yo'ntonic laj yac' sbaic ta stojol li Diose, ti muc junuc yo'ntonic ta stojole.

⁹ Li jchop liquemic ta Efraín ti lec chapal xchi'uc sflechaique iva'lupatijic sutel ta anil ti c'alal ja'o yorail muc'ta c'ope,

¹⁰ yu'un muc xich'ic ta muc' li c'usi chapanbil yu'un Diose; muc xch'unbeic li smantaltaque.

¹¹ La xch'ay ta yo'ntonic li c'usitic lec la spas ta stojolique, ja' li sq'uelubiltac stsatsal i'ac'bat yilique.

¹² Ta sat stot sme'ic laj yac' ta ilel sq'uelubiltac stsatsal li Diose; te laj yac' ta ilel ta Egipto banamil ta yosilal Zoán.

¹³ La svoc' li nabe, te laj yac' jelovicuc tal; la spajes ta jujujot li vo'e, jech la stselan sba muyel.

¹⁴ Ta c'ac'altique ta toc i'ac'bat yilic bu chbatic; ta ac'ubaltique ta xojobal c'oc' i'ac'bat yilic noxtoc.

¹⁵ La sjam jun ch'en te ta xocol banamil; bats'i epal vo' te iloc', ja' laj yac'be yuch'ic.

¹⁶ Toj tsots yoc li vo' iloc' ta ch'ene; ixanov batel jech chac c'u cha'al uc'um.

¹⁷ Pero lic ono'ox sa' smulic ta stojol Dios yan velta; te ta xocol banamil la stoy sbaic ta stojol li Boch'o te oy ta vinajele.

¹⁸ La sq'uelbeic c'u x'elan yo'nton li Diose, yu'un ja' la sc'an sve'ic li c'usi lec cha'ay stuquique.

¹⁹ Chopol ic'opojic ta stojol li Diose, jech laj yalic: “¿Me yu'un xu' chijyac'butic lec jve'eltic ta mexa li' ta xocol banamil li Diose?

²⁰ Ta melel ja' la sjam li muc'ta ch'ene, jech iloc' tal ep li vo'e; tsots xtomet loq'uel li vo'e, ixanov batel ta banamil. ¿Pero me xu' yu'un chijyac'butic jve'eltic noxtoc? ¿Me xu' yu'un chac'be ti'bol sti' noxtoc li steclumale?”, xiic.

²¹ Pero li Muc'ul Diose laj ya'ay, jech i'ilin. Itsan sc'ac'al yo'nton jech chac c'u cha'al c'oc'; lic yilinta li Jacobe.

²² Yu'un muc xich'ic ta muc' li Diose; muc xch'unic ti ja' chcoltaatic yu'une.

²³ Pero li Diose la spas batel ta mantal li toquetic ta toyole, xchi'uc la sjamanbe sti' li vinajele.

²⁴ La stocanbe yalel tal manavaj sve'ic; laj yac'be sve'ic li trigo te oy ta vinajele.

²⁵ Sve'el j'almantaletic laj yac'be sve'ic li yu'untaque; la stacbe tal lec sve'elic, ja' to ti bu c'alal inoj lec xch'utic oe.

²⁶ Ital tsots ic' ta sloq'uem c'ac'al; ta svu'el la stac tal muc'ta ic' ta stuq'uil sur.

²⁷ Te la xcuch tal epal ti'bol jech chac c'u cha'al pucuc; epal mut xlamet vulel jech chac c'u cha'al yi' ta ti'nab.

²⁸ Te vul yaluc ti bu spasoj scarpanaique; noj ivul li spat xocon scarpanaique.

²⁹ Ja' la sti'ic, lec inoj xch'utic o; jech i'ac'batic yu'un Dios, yu'un jech la sc'an yo'ntonic.

³⁰ Ac'o me noj ta ti'bol li yeique, pero ma'uc yu'un ipaj li c'usi tsc'an yo'ntonique.

³¹ Jech lic ilinuc li Diose. La smil li viniquetic ti toj tsotsique, laj yac' chamicuc li viniquetic ti lec xu' yu'unic te ta Israele.

³² Ac'o me jech ipasbatic, pero yo'to la sa' ep smulic; muc xich'ic ta muc' li sq'uelubil stsatsal Dios laj yac' ta ilele.

³³ Ja' yu'un ta anil no'ox ituch'bat yorailic yu'un li Diose; jmaq'uel no'ox ta satil itu'p o sc'oplalic.

³⁴ C'alal imilatic yu'un Diose, ja' to te lic yich'ic ta muc' li Diose. Scotol yo'ntonic la sa'ic, jech isutic o tal ta stojol.

³⁵ Ja' to te ivul ta yo'ntonic ti ja' jchabivanej yu'unic li Diose, xchi'uc ti ja' Jpojvanej yu'unic li Boch'o te oy ta vinajele.

³⁶ Pero i'epalc'opojic, ilo'lavanic xchi'uc yeic,

³⁷ yu'un muc j'ech'eluc tuc' yo'ntonic ta stojol; muc j'ech'eluc la xch'unic o li c'usi chapanbil yu'une.

³⁸ Pero li Diose ja' jc'uxubinvanej o, jech ipasbatic perdón li smulique; muc j'ech'eluc x'ulesatic o. Li Diose ep velta la sts'ic li sc'ac'al yo'ntone; muc j'ech'eluc x'ilin o ta stojolic.

³⁹ Yu'un la sna' ti beq'uet no'ox yich'ojique, ti ja' jechic jech chac c'u cha'al ic' chjelov ti mu xa sut o tale.

⁴⁰ Toj ep ta velta la stoy sbaic ta stojol te ta xocol banamil; ep laj yac'beic yat yo'nton te ta taqui banamil.

⁴¹ Ts'acal la sa'beic sc'ac'al yo'nton yan velta noxtoc; laj yac'beic yat yo'nton li Ch'ul Dios yu'un Israele.

⁴² Muc xa svules ta yo'ntonic c'u x'elan li stsatsal svu'ele, xchi'uc ti c'u x'elan ipojatic loq'uel ta sc'ob yajcontraique.

⁴³ Muc xa svules ta yo'ntonic ti ep senyailtac, ti ep sq'uelubiltac la spas te ta Egipto ta yosilal Zoane,

⁴⁴ ti la sc'atajes ta ch'ich' li uc'umetique, ti muc xa xuch'ic o li egiptoetique,

⁴⁵ xchi'uc ti la stac tal ep xcochetique jech iti'atic, xchi'uc la stac tal ep xch'uch'etic; ep i'ac'batic svocolic yu'un.

⁴⁶ Laj yac' lajuc ta xc'ajben noxtoc li sat c'usitic sts'unojique; laj yulesbe ta c'ulubetic li ts'unubaltic yu'unique.

⁴⁷ Laj yac' lajuc ta bot noxtoc li ts'usubtic yu'unique, xchi'uc ilaj ta tayo li higoetic yu'unique.

⁴⁸ Li vacaxetic yu'unique laj yac' chamicuc ta bot; li chijetic yu'unique la smil ta chauquetic.

⁴⁹ Laj yac'be xcuchic scotol li sc'ac'al yo'ntone, ja' li stojol mulile, li c'ux vocole, li lajele. Xco'laj xchi'uc jtsob jmilvanej j'almantaletic ital ta stojolic li lajele.

⁵⁰ J'ech'el laj yac'be xcuchic o li sc'ac'al yo'ntone, muc xa scolta o ta sventa li lajele; j'ech'el la sq'uelanbe o sbec'talic ta sventa lajel.

⁵¹ Jech noxtoc la smilbe scotol li sba xnich'nab egiptoetique, ja' li sba sts'unubic smomnich'nabtac Came.

⁵² Jech la sloq'ues o tal li steclumale; jmoj stsopetic batel ta xocol banamil jech chac c'u cha'al chijetic.

⁵³ Lec la xchabi tal, jech mu'yuc xi'el laj ya'yic; yan li yajcontraique te imuc ta nab scotol.

⁵⁴ Te vul yac' ta ch'ul banamil, ja' li vits ti ja' stuc la spoj ta stsatsal svu'ele.

⁵⁵ La snutsbe loq'uel scotol li yajvaltac yantic banamile, lec bisbil ta ch'ojon laj yich'ic li yosilique; ja' te laj yac' naquiicuc o ta yosilic li jaychop israeletique.

⁵⁶ Pero li stuquique la sa'beic sc'ac'al yo'nton li Diose. La stoy sbaic ta stojol li Boch'o te oy ta vinajele; muc xch'unbeic li smantaltaque.

⁵⁷ La sva'lupatinic comel li Diose; la stoy sbaic ta stojol jech chac c'u cha'al li stot sme'ic ta vo'onee. Ja' jech ic'otic jech chac c'u cha'al st'ilesubil flecha ti jeche' xotxote.

⁵⁸ Laj yaq'uic ilinuc Dios ta scoj li c'opojebaletic yu'unic ta vitsetique; laj yaq'uic it'ixajuc yo'nton ta scoj ti laj yich'ic ta muc' sloc'obal yan diosetique.

⁵⁹ Li Diose i'ilin ti c'alal laj yile, ja' yu'un j'ech'el la scomtsan o li israeletique.

⁶⁰ Jech noxtoc la scomtsan o li xch'ulna te ta Siloe, ja' li sna ti bu to'ox inaqui xchi'uc yu'untaque.

⁶¹ Jech noxtoc laj yac' batel ta c'abal li senyail svu'ele; laj yac'be ta sc'ob yajcontraic li slequilal yutsilale.

⁶² Laj yac' ta milel ta espada noxtoc li steclumale, yu'un ilic sc'ac'al yo'nton ta scojic.

⁶³ Chic'bil ta c'oc' ichamic li queremetic yu'unique; li tsebetic yu'unique mu'yuc bu spasic o q'uin nupinel xchi'uquic.

⁶⁴ Milbil ta espada ichamic noxtoc li paleetique; mu'yuc x'oc'taatic yu'un li me'on antsetic icom yu'unique.

⁶⁵ Ts'acal ilic li Cajvaltic ti xco'laj xchi'uc vayem la spas sbae; i'avan jech chac c'u cha'al tsatsal vinic ti yuch'oj poxe.

⁶⁶ Lic smil li yajcontrataque, j'ech'el tsalbil icom o yu'un; j'ech'el iyalic o ta q'uexlal.

⁶⁷ La sbajbe o li smomnich'nabtac Josee; mu'yuc la st'ujbe li smomnich'nabtac Efraine.

⁶⁸ Ja' la st'ujbe li smomnich'nabtac Judae, xchi'uc ja' la sc'an li vits Sione.

⁶⁹ La sva'an jun lequil ch'ulna yu'un; j'ech'el te la snacan o jech chac c'u cha'al banamil ti staoj lec yav oe.

⁷⁰ Ja' la st'uj noxtoc li yajtunele, ja' li Davide; te ay yic' tal ti bu to'ox ta xchabi xchije.

⁷¹ Te ay sa' tal ti c'alal te nabal tal ta spat li xchijtaque, yu'un ja' ac'o chabibatuc li steclumale; ja' jchabichij ac'o c'otuc te ta stojol li Israele.

⁷² Li Davide lec la xchabibe li steclumal Diose; scotol yo'nton, yutsil yo'nton la sventain, la stojobtas.