Salmos 77 - Bible in Tzotzil de Chenalhó with Deuterocanon

Toj ech'em svu'el stuc li Diose

Q'ueoj yu'un Asaf. Ja' la sventain li banquilal yu'un jq'ueojetic, Jedutún sbie.

¹ Tsots li'avan ta sc'anbel vocol li Diose, jech laj ya'ibun li jc'ope.

² C'alal oy at-o'nton chca'ye, ja' ta jsa' coltael yu'un li Cajvale. Scotol ac'ubal te xivulvun o ta sc'opanel; mu'yuc bu ta jcux o, pero mu ono'ox jta o smuc'ul co'nton chca'ay.

³ C'alal ta jna' li Diose, te chi'oc'; c'alal ep c'usi ta jnopilane, ta xlaj stsatsal co'nton chca'ay.

⁴ Dios cu'un, muc xavac' jmuts' o jutuc li jsate, ja' yu'un toj lajem xa jtsatsal chca'ay, mu xa xu' xic'opoj.

⁵ Ta to xvul ta co'nton c'u x'elan i'ech' tal li c'ac'al, li jabil ta vo'onee;

⁶ te cht'ab ta co'nton c'u x'elan li jq'ueoj liq'uejin ta ac'ubaltique; te ta jnopilan ta co'nton, jech ta jac'be jba:

⁷ “¿Me j'ech'el la sbajuncutic o li Cajvale? ¿Me mu'yuc chlic lecubuc yo'nton ta jtojolcutic yan velta?

⁸ ¿Me solel j'ech'el ilaj o li c'uxubinel yu'une? ¿Me j'ech'el la xch'ay o ta yo'nton li c'usi yaloj ono'ox ta jtojolcutique?

⁹ ¿Me ich'ay o ta yo'nton c'uxubinvanej li Diose? ¿Me yu'un solel j'ech'el i'ilin o? ¿Me mu'yuc xa abul jba chiyiluncutic?”, xichi.

¹⁰ Li c'usi toj c'ux chca'ye, ja' ti c'alal ta xquil ti mu xa jechuc yo'nton ta jtojoltic jech chac c'u cha'al ta vo'one li Boch'o te oy ta vinajele.

¹¹ Ta to jna' c'u x'elan yabtel li Boch'o te oy ta vinajele; ta to jna'ilan ti ep sq'uelubiltac la spas ta vo'onee.

¹² Ta to xvul ta co'nton, ta to jnopilan li c'usitic toj tsotsic, toj muc'tic la spase.

¹³ Dios cu'un, toj tuc' li be avu'une; mu'yuc yan dios toj muc' jech chac c'u cha'al vo'ot.

¹⁴ Vo'ot Diosot ti xu' avu'un chapas c'usi toj labalic sbae; laj avac' ta otquinel ta ep lumetic li avu'ele.

¹⁵ Ta atsatsal avu'el laj acolta li ateclumale, ja' li yalab xnich'nab Jacob xchi'uc Josee.

¹⁶ Dios cu'un, c'alal laj yilot li nabe, ixi'; inic ta xi'el c'alal to ta xchac li natil nabe.

¹⁷ Li toquetique laj yaq'uic tal tsots vo'; it'om chauquetic ta vinajel; sts'aylajet no'ox ta buyuc li sacsevuletic avu'une.

¹⁸ Ivinaj xt'omlajet no'ox ta sutub ic' li chauquetic avu'une. Li sacsevuletique isacjamtaj yu'unic li banamile; tsots ibac', tsots inic li banamile.

¹⁹ Ja' abe ic'ot li yut nabe; ja' te lajelov tal ta pimil nab, mu'yuc boch'o laj yilbot yav avacan.

²⁰ Ta sventa Moisés xchi'uc Aarón laj achabi tal li jteclum avu'un ti ja' jechic jech chac c'u cha'al chijetique.