Salmos 76 - Bible in Tzotzil de Chenalhó with Deuterocanon

Ja' tstsalvan stuc li Diose

Q'ueoj yu'un Asaf. Laj yich' q'uejintael ta sonetic ti oy yaq'uile. Ja' la sventain li banquilal yu'un jq'ueojetique.

¹ Li Diose lec otquinbil te ta Jerusalén; toj muc' ch-a'ibat sbi te ta Israel.

² Li ch'ulna yu'un ti pasbil ta nucule te oy ta Salem; ti bu nacale te ta Sión.

³ Ja' te la sc'as li flechaetic, li espadaetique; ja' te la svoc' li macubbailetique xchi'uc li yantic abtejebaletic sventa pasub c'ope.

⁴ Toj ech'em avutsilal Dios cu'un; toj ech'em amuc'ul, yu'un toj ep c'usi laj apojbe li avajcontrae.

⁵ Li soldadoetic ti tsots yo'ntonique ichamic o; li jpasc'opetique mu'yuc c'usi xu' yu'unic o.

⁶ Dios cu'un, vo'ot li Diosot yu'un Jacobe, ta xi'elal stsatsal ac'op no'ox ipaj ta xanubal avu'un li caretaetic xchi'uc li ca'etique.

⁷ Dios cu'un, li vo'ote xi'bilot. ¿Boch'o xu' yu'un chva'i ta asat ti c'alal chlic sc'ac'al avo'ntone?

⁸ Te to ta vinajel laj avac' tal ta a'yel ti tuc' chachapanvane; scotol li cristianoetic ta banamile ixi'ic, ch'anxaxi lamal icomic.

⁹ C'alal chlic chapanvanane Dios cu'un, ja' sventa chacolta li boch'otic uts'intabilic li' ta banamile.

¹⁰ Li sc'ac'al yo'nton avajcontrae ja' chc'ataj ta avich'el ta muc'; li juteb no'ox sc'ac'al yo'ntonique ja' chc'ataj ta acorona.

¹¹ Alic ta jamal ta stojol Muc'ul Dios li c'usi chac'an chapasique, pero c'otuc me ta pasel avu'unic. Acotolic vo'oxuc ti te seteloxuc ta spat ta xocone, ich'beic tal smoton, yu'un ja' no'ox stuc tsc'an ta jxi'tic.

¹² Ja' xu' yu'un chtuch'be xcuxlejalic li banquilaletique; ja' xi'bil yu'un scotol li ajvaliletic ta banamile.