Salmos 74 - Bible in Tzotzil de Chenalhó with Deuterocanon

Sc'opanel Dios ta sventa israeletic

Q'ueoj yu'un Asaf.

¹ Dios cu'un, ¿c'u yu'un ti j'ech'el laj abajuncutic oe? ¿C'u yu'un ti ilic sc'ac'al avo'nton ta stojol li achijtac ti te oyic ta sve'ub avu'une?

² Na'o me li jteclum avu'un ti laj ono'ox apoj tal ta vo'onee, xchi'uc ti laj ono'ox acolta tal ta sventa chavu'unin oe. Jech noxtoc na'o me li vits Sión ti bu lanaquie.

³ La' q'uelavil, iyavnaij xa o li ch'ulna avu'une; q'uelavil, laj xa soquesic o scotol li avajcontrae.

⁴ Li avajcontrataque x'avlajetic no'ox te ta yav li ch'ulna avu'une, yu'un itsalvanic xa; laj xa sjoc'anbeic senyail ti spasojic xa canale.

^5-6 C'alal ivulique, xt'ojlajetic stseplajetic no'ox vulel, jech chac c'u cha'al tsts'etubajic ta toyolaltic, yu'un ja' vul slilinic ta eq'uel, ta martillo li ste'eltac ach'ulna ti toj c'upilic sbae.

⁷ Xchi'uc laj yac'beic sc'ac'al li ch'ulna avu'une; la soquesbeic o sc'oplal li ch'ulna avu'une; la sjinesic yalel c'alal ta banamil.

⁸ Jech laj yal ta yo'ntonic: “Jlajestic o ta j'ech'el”, xiic. La xchiq'uic scotol li snailtac bu chaquich'otcutic ta muq'ue.

⁹ Mu'yuc xa te oy li c'usitic ts'u'iltasbil chtun ta atojole. Mu xa junuc j'alc'opetic cu'uncutic noxtoc; me junuc mu boch'o sna' cu'uncutic baq'uin ch-ech' li vocol le'e.

¹⁰ Dios cu'un, ¿baq'uin to chlaj jc'oplalcutic ta na'leel yu'un li cajcontracutique? ¿Me jech te sta yav o chchopolc'opojic ta atojol li avajcontrae?

¹¹ ¿C'u yu'un ti mu'yuc bu chabaq'ues o ac'obe? ¿C'u yu'un ti jeche' te ameyoj o ac'obe?

¹² Vo'one ono'ox vo'ot ajvalilot cu'un; ep velta laj acoltauncutic li' ta sba li banamile, Dios cu'un.

¹³ Ta atsatsal laj avoc' li muc'ta nabe; laj avoc'be sjolic li smuc'tiquil chanul nabe.

¹⁴ Laj avoch'be sjoltac li Leviatán, ti toj xi'bal sbae; ja' laj avac'be sve'elin li xchanultac xocol banamile.

¹⁵ Laj at'omes loq'uel tal vo' xchi'uc uc'umetic; laj ataquijes li uc'um ti mu ono'ox sna' x'ul oe.

¹⁶ Ja' avu'un li c'ac'altique; ja' avu'un noxtoc li ac'ubaltique. Vo'ot laj apas noxtoc li ue xchi'uc li c'ac'ale.,

¹⁷ Vo'ot laj achapan bu c'alal chpaj sti'iltac li banamile; vo'ot laj apas li yorail q'uepelaltic xchi'uc li yorail vo'olaltique.

¹⁸ Muc'ul Dios, na'o me ti chasna'leicot li jcontrainvanejetique; ta xchopolc'opojic ta atojol li bol cristianoetique.

¹⁹ Mu me xach'ayuncutic ta avo'nton vu'uncutic ti ja' jechuncutic jech chac c'u cha'al puruvoc stsue, vu'uncutic ti oy ep jvocolcutique; mu me xavac'uncutic ta sc'ob li jti'vanej bolometique.

²⁰ Mu me xach'ay ta avo'nton li c'usi achapanoje, yu'un li cosilalcutique noj ta puru vocol, ta puru uts'intael c'alal to ta jujujot sti'.

²¹ Mu me xavac' xyalic o ta q'uexlal li boch'otic tsalbilic xae; ac'o no'ox yalic alequilal li boch'o abul sbaique xchi'uc li me'onetique.

²² Dios cu'un, la' me pojo aba. Na'o me ti te chchopolc'opojic o ta atojol scotol ora li bol cristianoetique.

²³ Mu me xch'ay ta avo'nton ti x'avlajetic ta atojol li avajcontrae; mu me xch'ay ta avo'nton ti xvochlajetic no'ox ta atojol scotol orae.