Salmos 73 - Bible in Tzotzil de Chenalhó with Deuterocanon

LIBRO III (Salmos 73—89 ) Toj ep smuc'ul yo'nton li Diose

Q'ueoj yu'un Asaf.

¹ Li Diose ta melel toj lec yo'nton ta stojol li Israele; toj lec yo'nton ta stojol li boch'o lecuben xa yo'ntonique.

² Pero li vu'une jutuc xa mu liyal ta lum; jutuc xa mu ijaxbuj li cacane,

³ yu'un i'it'ixaj co'nton yu'un li jchi'iltac ti jtoybaetique, yu'un laj quil ti ja' toj ven lec c'usi tstaic li boch'otic chopol yo'ntonique.

⁴ Li stuquique mu'yuc ta yo'ntonic me oy chchamic, yu'un lec tsotsic, mu'yuc xchamelic o.

⁵ Mu'yuc at-o'nton cha'yic; mu'yuc svocol cha'yic jech chac c'u cha'al li yan cristianoetique.

⁶ Ja' xa snats'inojic o li stoyobbailique; ja' xa slapojic o li sa'c'op, li majbaile.

⁷ Solel juben xa xchi'uquic o, jeche' xa ut'ajtic li satique; solel ijelov ta bis li c'usi chopol tsnop ta yo'ntonique.

⁸ Chlabanvanic, puru chopol c'usi chalic; ja' no'ox chalilanic o ti tsc'an ch-uts'intavanique; ta puru toyba chc'opojic.

⁹ Chchopolc'optaic li Dios ta vinajele; chopol chc'opojic ta sbejel li banamile.

¹⁰ Ja' yu'un chvovijic ta be li steclumal Diose, ja' chlic xch'unic scotol c'usiuc no'ox chalic li boch'otic chopolique.

¹¹ Jech chlic yalic: “¿C'uxi tsna' Dios li c'usi ta jpastique? ¿Me yu'un oy lec sbijil li Boch'o te oy ta vinajele?”, xiic.

¹² Q'uelavilic li boch'otic chopol yo'ntonique, ta sjunul yo'ntonic ta stsob ep sc'ulejalic.

¹³ Li vu'une altic laj cac' persa la jchabi jba ta sventa li c'usi chopole, ti mu'yuc bu laj quic'ubtas jc'ob ta spasel li muliletique,

¹⁴ yu'un jujun c'ac'al puru nucul chquich'; puru vocol chquich' ta jujun sob.

¹⁵ Ti jechuc laj cal ec jech chac c'u cha'al chalique, ep xa la jlo'la avu'untac ti jechuque.

¹⁶ Ja' yu'un laj cac' persa la jnopilan c'usi tstaic ta ts'acal, pero toj tsots abtel laj ca'ay.

¹⁷ Ja' to ti c'alal li'och ta ch'ulna avu'une, la jna' ti oy c'usi chc'ot staic ta ts'acal li cristianoetic le'e.

¹⁸ Yu'un ja' xa laj avac'beic stam batel li be ti toj bilile, xchi'uc laj anet' batel ta sventa lajel.

¹⁹ Anil no'ox xu' chchamic; ta xi'el no'ox xu' chlajic, jech ta xch'ayic o batel.

²⁰ Li vo'ote Cajval, chach'ayes o ta avo'nton jech chac c'u cha'al boch'o chvaychin, ti chch'ay ta yo'nton xvayech c'alal tstots ta svayabe.

²¹ Toj ven st'uset co'nton laj ca'ay; oy c'usi te pajal ta yut co'nton laj ca'ay.

²² Yu'un bats'i mu xca'ibe o smelol, toj bolun laj ca'ay; ja' jechun jech chac c'u cha'al jcot chonbolom ta atojol.

²³ Pero ta sventa ti te ono'ox nabalun o ta atojole, laj atsacbun jbats'ic'ob.

²⁴ Laj atuq'uibtasun batel ta sventa li taq'uiel avu'une; ts'acal chavic'un batel ta lequilal.

²⁵ ¿Boch'o yan oy cu'un te ta vinajele? Ja' no'ox vo'ot, Dios cu'un. Ta sventa ti te oyun o ta atojole, mu'yuc c'usi yan ta jc'an li' ta banamile.

²⁶ Li jbec'tal xchi'uc co'ntone ta xlaj yip, pero li stsatsal co'ntone ja' li Diose; mu'yuc c'usi yan sc'an chca'ay o sbatel osil.

²⁷ Yu'un li boch'otic chnamajic ta atojole ta xch'ayic o; li boch'otic mu junuc yo'nton ta atojole chavules o.

²⁸ Pero li vu'une chinopaj ta atojol, yu'un ja' toj lec chca'ay. Vo'ot no'ox cac'oj jba o ta ac'ob, Muc'ul Dios, vo'ot li Cajvalote; ta xcal batel scotol ti c'u x'elan avabtele.