Salmos 72 - Bible in Tzotzil de Chenalhó with Deuterocanon

C'u x'elan yabtel jun tuq'uil ajvalil

Ja' sventa Salomón.

¹ Dios cu'un, ac'bo yo'ntonin stuq'uil avo'nton; ac'bo yo'ntonin slequil avo'nton li ajvalile.

² Yu'un jech lec tuc' ac'o xchapan li ateclumale; lec tuc' ac'o sventain li me'onetic avu'une.

³ Ac'o vinajuc ta vitsetic yu'unic ti staojic jun yo'ntonic li ateclumale; ac'o vinajuc ta yosilalic ti staojic tuq'uil chapanele.

⁴ Tuc' ac'o xchapan li boch'otic oy svocolique, ac'o scolta li boch'otic mu'yuc c'usi oy yu'unique; yan li j'uts'intavanejetique pech'bil ac'o comuc ta teq'uel yu'un.

⁵ Ac'o yich'ot o ta muc' ti jayib c'ac'al cuxule, ti jayc'ol alab nich'nabetic chjelove.

⁶ Ac'o jechuc jech chac c'u cha'al vo' ti chat'es lec li ts'i'laletique, xchi'uc jech chac c'u cha'al job osil ti tsc'unibtas li banamile.

⁷ Tuc' ac'o batuc yu'un scotol ti jayib c'ac'al cuxule; ac'o junuc o yo'nton c'alal to tsta yorail chlaj sc'oplal li ue.

⁸ Ac'o sventain batel ti xlic ta ti'nab, c'alal to ta yan jot nabe, xchi'uc ti xlic ta uc'um Éufrates c'alal to ta jot sti' banamile.

⁹ Ac'o squejan sbaic ta stojol, ac'o sbic'tajes sbaic ta stojol scotol li yajcontratac nacalic ta xocol banamile.

¹⁰ Li ajvaliletic ta Tarsis xchi'uc ta ti'ti' nabe, ac'o tal yac'beic smoton; Li ajvaliletic ta Sabá xchi'uc ta Sebae, ac'o tal yac'beic c'usitic oy yu'unic.

¹¹ Ac'o squejan sbaic ta stojol scotol li yantic ajvaliletique; ac'o abtejicuc yu'un scotol li cristianoetic ta yantic banamile.

¹² Yu'un ja' tscolta li boch'otic abul sbaique xchi'uc li boch'otic oy svocolic ti mu'yuc boch'o chcoltaatique.

¹³ Ja' chc'uxubin li boch'otic toj biq'uit ch-ilatique, xchi'uc tscolta c'u cha'al mu xlajic ta milel.

¹⁴ Tscolta noxtoc ta sventa svocolic, xchi'uc ta sventa uts'intael, yu'un toj tsots sc'oplal cha'ibe li xcuxlejalique.

¹⁵ Ich'biluc ta muc' li ajvalile. Ac'o ac'batuc li c'anal taq'uin chlic tal ta Sabae; ac'o c'opanbatuc Dios ta stojol scotol ora; ac'o ac'batuc bendición scotol c'ac'al.

¹⁶ Ac'o oyuc ep trigo li' ta banamil; ac'o nojuc batel ta trigo li joljolvitse; ac'o yac' ep sat jech chac c'u cha'al Líbano. Li jnaclumetic te ta lume ac'o xojobanicuc no'ox ta nich jech chac c'u cha'al nichimaltic.

¹⁷ Sbatel osil te ac'o comuc o sbi li ajvalile; te ac'o oyuc o ti c'alal te to oy li c'ac'ale; ac'o staic bendición scotol banamiletic ta sventa. “Toj lec li ajvalile”, ac'o xiicuc scotol li cristianoetique.

¹⁸ Ac'o ich'atuc ta muc' li Muc'ul Diose, ja' li Dios yu'un Israele, yu'un ja' no'ox stuc xu' yu'un tspas senyail sq'uelubiltac.

¹⁹ Ac'o ich'atuc ta muc' sbatel osil li xch'ul bie; ac'o nojuc ta slequilal scotol li banamile. Jech ac'o c'otuc ta pasel. Jechuc.

²⁰ Li' ilaj yo'nton ta sc'opanel Dios li Davide, ja' li xnich'on Isaie.