Salmos 71 - Bible in Tzotzil de Chenalhó with Deuterocanon

La sc'opan Dios jun mol

¹ Muc'ul Dios, vo'ot no'ox la jc'an chabiel ta atojol; me jutuc mu'yuc bu xiyal o ta q'uexlal avu'un.

² Pojun xa me, coltaun xa me, yu'un vo'ot tuc' avo'nton; tuc'ulanbun xa me li jc'ope, coltaun xa me.

³ Vo'ot jnac'ubbailot jech chac c'u cha'al jbej tsatsal ton; vo'ot laj aventainun ti jech colem licome; vo'ot yip stsatsalot co'nton.

⁴ Dios cu'un, mu me xavac' ochcun ta sc'ob li chopol cristianoetique; coltaun me loq'uel ta sc'ob li j'uts'intavanejetique, li jsa'c'opetique.

⁵ Yu'un li vo'ote Muc'ul Dios, vo'ot smuc'ul stsatsal co'nton c'otemot; ta jbic'tal ono'ox jch'unoj ti jbel sc'oplal chacoltaune.

⁶ C'alal tiq'uilun to'ox ta yut xch'ut jme'e, vo'ot ta aventa ti lec ono'ox oyune, xchi'uc vo'ot ono'ox laj avac' ti lec livoq'ue; sbatel osil vo'ot no'ox chacalbot alequilal.

⁷ Ep boch'otic labal laj yilic ti c'alal oy ep jvocole, pero vo'ot no'ox jnac'ubbail lac'ot cu'un.

⁸ Ja' yu'un scotol c'ac'al ja' sbel que o li alequilal avutsilale; ja' chcalilan o li alequilal avutsilale.

⁹ Mu me xabajun, yu'un limalub xa; mu me xacomtsanun, yu'un i'alub xa li jbec'tale.

¹⁰ Yu'un li cajcontrataque ta xa xlo'ilajic ta jtojol; li boch'otic tsc'an ox chismilicune jmoj la stsob sbaic ichopolc'opojic.

¹¹ Jech chalic: “Icomtsanat xa yu'un li Dios yu'une; bat nutsic, bat tsaquic, yu'un mu'yuc xa boch'o chcoltaat yu'un”, xiic.

¹² Mu me xanamaj ta jtojol, Dios cu'un; coltaun me ta ora, yu'un vo'ot Diosot cu'un.

¹³ Ac'o q'uexovicuc, tsalbil ac'o comicuc li cajcontrataque; j'ech'el ac'o yalicuc o ta q'uexlal, ac'o soquicuc o li boch'otic tsc'an chismilicune.

¹⁴ Pero li vu'une vo'ot no'ox jpatoj co'nton ta atojol; ech'em to xu' chcal alequilal.

¹⁵ Li quee scotol c'ac'al ta spuc batel ti toj tuc' avo'ntone, xchi'uc li c'usitic laj apas ta sventa laj acoltaune, ac'o me mu xa jna c'u yepal li c'usitic laj apase.

¹⁶ Muc'ul Dios, vo'ot li Cajvalote, ta xcal scotol li c'usitic toj muc'tic, toj tsotsic laj apase; ta xcal batel ti vo'ot no'ox atuc toj tuc' avo'ntone.

¹⁷ Dios cu'un, oy c'usi lec laj achanubtasun tal ta jqueremal; yoquel to jbats'il yalel o li c'usitic toj tsotsic laj apase.

¹⁸ Ac'o me molun xa, me sac xa jol, pero mu me xacomtsanun, Dios cu'un. Ta to me xcalbe ya'yic c'u x'elan atsatsal avu'el, xchi'uc c'usitic toj muc'tic laj apas li ts'acal olnich'onetic li'i, xchi'uc li boch'otic ts'acal to ta xtalique.

¹⁹ Li stuq'uil avo'ntone, Dios cu'un, xc'ot c'alal to ta vinajel; toj tsotsic, toj muc'tic li c'usitic laj apase. Mu'yuc boch'o yan jech chac c'u cha'al li vo'ote, Dios cu'un.

²⁰ Ac'o me laj quil ep jvocol avu'un, ac'o me toj abul xa jba laj ca'ay, pero laj avac' cuxuc banamil chca'ay yan velta; laj xa atoyun liquel ta ach' yan velta.

²¹ Laj avac' muq'uibuc lec jc'oplal yan velta; laj amuq'uibtasbun co'nton yan velta.

²² Ja' yu'un ec li vu'une ta jq'uejinta alequilal ta sonetic; Dios cu'un, ta jq'uejinta ta arpa li yutsil avo'ntone, vo'ot li Ch'ul Diosot yu'un Israele.

²³ Toj xcuxet no'ox co'nton ti c'alal ta jq'uejinta alequilale; toj xcuxet no'ox cha'ay scotol li jbec'tale yu'un vo'ot laj acolta ti cuxul toe.

²⁴ Jech noxtoc li quee scotol c'ac'al chalilan o ti toj tuc' avo'ntone, yu'un iyalic xa ta q'uexlal avu'un; tsalbil icomic avu'un li boch'otic tsc'an ox chiyac'bicun jvocole.