Salmos 70 - Bible in Tzotzil de Chenalhó with Deuterocanon

Sc'opanel Dios yu'un ac'o stsalbutic cajcontratic

Q'ueoj yu'un David sventa oy c'usi la svules ta yo'ntonic; ja' la sventain li banquilal yu'un jq'ueojetique.

¹ Dios cu'un, la' me loq'uesun ta jvocol; Dios cu'un, ac'bo me tal yipal ta ora ta jcoltael.

² Ac'o yalicuc ta q'uexlal li boch'otic tsc'an chismilicune; ac'o va'lupatijicuc sutel ta q'uexlal li boch'otic chopol yo'ntonic cu'une.

³ Ta q'uexlaluc ac'o jatovicuc sutel li boch'otic stse'inic no'ox ta jlabanele.

⁴ Pero scotol li boch'o chasa'ote ac'o cuxetuc no'ox yo'ntonic, ac'o tse'inicuc no'ox. “Toj muc' li Dios cu'untique”, ac'o xiicuc scotol ora li boch'o tsc'anic coltael avu'une.

⁵ Li' ta orae, toj ep jvocol li vu'une, toj abul jba. La' me coltaun ta ora Dios cu'un, vo'ot jcoltavanejot cu'un, jpojvanejot cu'un; Muc'ul Dios, mu me xamala jal.