Salmos 7 - Bible in Tzotzil de Chenalhó with Deuterocanon

Li Muc'ul Diose ja' tuq'uil jchapanvanej

Q'ueoj sventa oq'uel yu'un David. Ja'o la sq'uejinta ta stojol Muc'ul Dios ta sventa c'usi i'albat yu'un li Cus xnich'on Benjamine.

¹ Muc'ul Dios, Dios cu'un, vo'ot no'ox jpatoj co'nton ta atojol; coltaun me, mu me xi'och ta sc'obic li boch'otic chiyuts'intaicune.

² Pojun me, yu'un ja' jechic jech chac c'u cha'al jti'vanej bolometic, yu'un xu' chixvoch'iicun ti me mu'yuc boch'o chiscoltaune.

³ Muc'ul Dios, Dios cu'un, ¿C'usi smelol ti jech chc'ot ta pasele? ¿Me yu'un oy c'usi chopol la jpas?

⁴ ¿Me yu'un van oy c'usi chopol la jpasbe li boch'o lec c'usi spasojbune? ¿Me oy van mu'yuc smelol c'usi la jpasbe li cajcontrae?

⁵ Me oy jech la jpase, ac'o snutsun batel li cajcontrae, ac'o stsacun, ac'o xjochun ta banamil, ac'o sbic'tajesbun o jc'oplal.

⁶ ¡Muc'ul Dios, la' me xchi'uc sc'ac'al avo'nton! La' va'lebin aba xchi'uc sc'ac'al yo'ntonic li cajcontrae, yu'un chapal avu'un c'u x'elan chachapanvan. Na'un me li vu'une, coltaun me.

⁷ Tsobo tal ta atojol li cristianoetic ta jujun banamile; ac'o ta ilel ti vo'ot toj muc'ote.

⁸ Muc'ul Dios, vo'ot ti chachapan scotol cristianoetique, chapanun me ta sventa ti c'u yepal tuc' c'usi jpasoje; chapanun me ta sventa ti c'u yepal lec c'usi jnopoje.

⁹ Dios, vo'ot ti tuc' avo'ntone, aviloj scotol c'usitic ta jnopcutic; xana' c'usi oy ta yut co'ntoncutic. Lajesbo sc'oplal c'usi chopol tsnop li boch'otic chopolique. Pasbo o ta jun yo'ntonic ta atojol li boch'otic lequique.

¹⁰ Li Dios ta toyole ja' jmacubbail c'otem, yu'un ja' tscolta li boch'o tuc' yo'ntone.

¹¹ Li Diose ja' tuq'uil jchapanvanej; scotol ora chopol chil li boch'otic chopol c'usi tspasique.

¹² Me mu sutes yo'ntonique, li Diose ta xjuxbe lec ye li yespadae. Chapal xa lec yu'un li st'ilesubil sflechae;

¹³ meltsajem xa lec yu'un li flechaetic ti tsanajtic sni'e. Chapal xa lec li yabtejeb ta sventa lajele.

¹⁴ Q'uelavilic, li boch'o chopol yo'ntonique ina'p xa xch'utic; chch'i xa xch'utic yu'un li c'usi chopol oy ta yo'ntonique, jech puru epalc'op tsvoq'uesic.

¹⁵ Ven natil ch'en sjoc'ojic, pero ja' no'ox te ch-och yalel stuquic.

¹⁶ Li c'usi chopol snopojique chjoybij ta sba stuquic; li vocol chaq'uique te chcuch stuquic.

¹⁷ Ta xcalbe slequilal li Muc'ul Diose yu'un ja' tuc' yo'nton; ta jq'uejintabe sbi li Muc'ul Dios ti te oy ta vinajele.