Salmos 69 - Bible in Tzotzil de Chenalhó with Deuterocanon

Avanel ta sventa vocol

Q'ueoj yu'un David. “Nichim”, xi sbi snuq'uilal laj yac'be; ja' la sventain li banquilal yu'un jq'ueojetique.

¹ Dios cu'un, coltaun me, yu'un ta xa jic' li vo'e.

² Ta xa ximuc ochel ta natil ach'eltic chca'ay; mu'yuc xa bu xu' ta jtec'an li cacane. Laj xa jta jun natil nab; ta xa xixcuchun batel li yipe.

³ Ic'uxub xa jnuc' ta avaptael; imac xa li sbe quiq'ue; ilub xa li jsat ta amalaele, yu'un te xiq'uelc'un o avu'un.

⁴ I'epajic ta jyalel li boch'o chiscontrainicune; i'ech' xa jech yepalic jech chac c'u cha'al stsotsil jol; laj xa yich' lec stsatsalic li cajcontrataque. Mu'yuc smelol ti tsc'an chismilicune; jech no'ox tsc'anic ta jsutes li c'usi mu'yuc quelc'anoje.

⁵ Li vo'ote, Dios cu'un, xavotquin ti c'u yepal jbolil ta atojole, yu'un mu'yuc macal ta asat ti c'u yepal jmul jtaoje.

⁶ Cajval, Muc'ul Dios, vo'ot ti chapas ta mantal scotole, mu me xlabanatic ta jcoj li boch'o xch'unojic ti vo'ot chacoltae. Dios yu'un Israel, mu me xyalic ta q'uexlal ta jcoj li boch'otic vo'ot no'ox chasa'icote.

⁷ Yu'un vo'ot ta aventa ti ep laj quich' contrainele; solel xjumlajet ta q'uexlal li jsate.

⁸ Yan xa vinicun laj yilic li jchi'iltac ta voq'uele; mu xa xiyotquinicun scuyojic li boch'otic jun jme' jchi'uque.

⁹ Ta xa xicham ta scoj ti tsots sc'oplal chca'ay li ch'ulna avu'une. Jech noxtoc vu'un laj cuch scotol li chopolc'optael chayac'bicot li jchopolc'optavanejetique.

¹⁰ Ep li'oc', ep laj quicta ixim, pero ja' no'ox la slabanicun.

¹¹ La jlap c'u'il sventa vocol ti ch'ixlajan ta lapele, pero ja' no'ox xvochetic ta jtse'intael.

¹² Puru ta jcontra chc'opojic li cristianoetic buyuc no'ox tsobolique; sq'uejimolicun no'ox cha'yic li jyacubeletique.

¹³ Pero li vu'une, Muc'ul Dios cu'un, vo'ot no'ox chajc'opanot; coltaun ta sventa ti toj ep ac'anojune; tac'bun me li jc'ope yu'un mu xlaj li coltael avu'une.

¹⁴ Loq'uesun xa li' ta natil ach'eltique; mu me teuc ximuc o batel. Coltaun xa ta sventa li uts'intaele; loq'uesun xa li' ta natil nabe.

¹⁵ Mu me xavac' xcuchun batel li yip uc'ume; mu me xavac' xisbic'un ochel li natil xabe; mu me xavac' smac sba li sti'e.

¹⁶ Muc'ul Dios, tac'bun me li jc'ope, yu'un toj lec avo'nton, toj lec chac'anvan. Coltaun me ta sventa ti toj ep yutsil avo'ntone.

¹⁷ Mu me xanac' asat ta stojol li avajtunele, yu'un mu xa xnel li jvocole; tac'bun me ta ora li jc'ope.

¹⁸ Nopajan tal ta jtojol, la' pojun; coltaun ta sventa li cajcontrataque.

¹⁹ Aviloj xa scotol li jvocole, xchi'uc li q'uexlal, li labanel laj quich'e; oy ta asat scotol li boch'otic chiscontrainicune.

²⁰ Ituch' xa co'nton yu'un li chopolc'optael laj yac'bicune; alubenun xa, mu'yuc xa jtsatsal chca'ay. La jmala me oy boch'o chic'uxubaj to ta yo'nton, pero mu'yuc; la jmala me oy boch'o chtal spatbun co'nton, pero mu'yuc noxtoc.

²¹ Ja' no'ox laj yac'bicun jve' li c'usi toj ch'ae; c'alal taquin co'ntone, ja' no'ox laj yac'bicun pasem ya'lel ts'usub cuch'.

²² Ac'o c'atajuc ta xch'ajanulic li sve'elic ta sq'uinique; ac'o c'atajuc ta spets'ulic li c'usi toj lec cha'yique.

²³ Ac'o macuc o satic, yu'un jech mu me xilic; ac'o nicuc li yacanique, jech nicnunuc ac'o comuc o.

²⁴ Ac'o c'otuc ta stojolic, ac'bo xcuchic li sc'ac'al avo'ntone.

²⁵ Ac'o yavnaijuc o li snaique. Mu'yucuc xa boch'o te chnaqui o ta scarpanaic.

²⁶ Yu'un la scontrainic li boch'o laj avac'be tsots svocole; la slabanic li boch'o cha'ibe xc'uxul syayijemal avu'une.

²⁷ Ac'bo xcuchic o li c'usi chopol la spasique; mu me x'ochic ta lequilal avu'un.

²⁸ Tu'pbo o sbiic ta svunal li cuxlejal sventa sbatel osile; mu me co'oluc tsacal sbiic xchi'uc li boch'o tuc' yo'ntonique.

²⁹ Li vu'une toj ep jvocol, toj abul jba, pero li coltael avu'une, Dios cu'un, ja' chistoyun liquel.

³⁰ Ta xcalbe slequilal sbi ta q'ueojetic li Diose; ta xcac' ta ich'el ta muc' ta sventa q'ueojetic.

³¹ Le'e ja' toj lec chil li Muc'ul Diose, xjelov to jech slequil chil jech chac c'u cha'al li vacax chich' milbel smotonine, o jech chac c'u cha'al li ch'ium tot vacax ti oy lec xulube xchi'uc ti lec cha'xol svoye.

³² C'alal jech chilic li boch'otic oy svocole, toj xcuxet no'ox yo'ntonic; ta stsatsub o yo'ntonic li boch'otic tsa'ic Diose.

³³ Yu'un li Muc'ul Diose cha'ibe sc'op li me'onetique, muc teuc no'ox tsjip ta yo'nton li yu'untac ti ochemic ta chuquele.

³⁴ Ac'o yich'ic ta muc' Dios c'alal ta vinajel, ta banamil, ta nabetic, xchi'uc scotol li c'usitic cuxajtic tee.

³⁵ Yu'un li Diose ja' tscolta li yu'untac te ta vits Sione; ta xcha'va'anan li lumetic ta yosilal Judae, ja' te ta xnaquiic o, ja' ta xac'be yu'uninic o.

³⁶ Ja' yu'unic chcom o li smomnich'nab yajtuneltaque; li boch'otic tsc'anic Diose ja' te chnaquiic o.