Salmos 68 - Bible in Tzotzil de Chenalhó with Deuterocanon

Q'ueoj sventa c'alal i'ochic batel ta yosilic li israeletique

Q'ueoj yu'un David; laj yich' q'uejintael, ja' la sventain li banquilal yu'un jq'ueojetique.

¹ C'alal chlic spas yabtel li Diose, ta spuc sbaic batel li yajcontrataque; ta xjatovic loq'uel ta stojol li boch'otic tsbajic li Diose.

² Ta sacch'ayic batel jech chac c'u cha'al ch'ayil; ta x'ulic jech chac c'u cha'al chab ti ch-ul ta c'oq'ue. Li boch'otic chopolique j'ech'el ch'ayemic o ta stojol Dios.

³ Yan li boch'otic tuc' yo'ntonique xcuxet no'ox yo'ntonic, jun no'ox yo'ntonic ta stojol Dios; xbitubajic no'ox ta sventa ti toj xcuxet yo'ntonique.

⁴ Q'uejinanic yu'un li Diose; q'uejintabeic ta q'ueojetic li sbie. Ich'ic ta muc' li boch'o chcaji ta ba toque, ja' li Muc'ul Diose; cuxetuc no'ox avo'ntonic ta stojol.

⁵ Ja' li Dios ti nacal ta xch'ulnae; ja' stotic c'otem li boch'otic mu'yuc xa stot sme'ique; ja' Jc'opojel yu'unic li me'on antsetique.

⁶ Li boch'o comtsanbil stuquique, ja' ta x'ac'bat snaic yu'un li Diose. Li boch'o chucbilique ta scolta, ta xac'be scotol c'usi chtun yu'unic. Yan li jtoybaetique ta xac' naquiicuc ta taqui banamil.

⁷ Dios cu'un, c'alal ba'yucbeot tal yu'un li ateclumale, c'alal laxanov tal achi'uc ta xocol banamile,

⁸ inic li banamile, iyal tal vo' ta vinajel; li vits Sinaie inic ta atojol, vo'ot li Diosot yu'un Israele.

⁹ Dios cu'un, bats'i tsots laj avac' taluc li vo'e, yu'un jech laj avac' xcux lec li avosil ti paq'uem xae.

¹⁰ Ja' te laj avac' naquiicuc li avu'untaque; li me'onetique yutsil avo'nton laj avac'be c'usi chtun yu'unic.

¹¹ Li Cajvaltique oy c'usi laj yal; ep boch'otic la spuquic batel li c'usi laj yale.

¹² Ijatovic xa batel xchi'uc yajsoldadoic li ajvaliletique; li antsetic ti te icomic ta nae laj xa spucbe sbaic li c'usi la spojbeic yajcontraique.

¹³ Li vo'oxuque jun avo'ntonic te mocholoxuc ta ti' c'oc', pero ep c'usi laj ataic. Pixil lacomic ta saquil taq'uin, jech chac c'u cha'al stsumut ti pixil lec ta sc'uc'umale; oy c'usi c'onc'ontic xa sba xic' laj ataic jech chac c'u cha'al bats'i lequil c'anal taq'uin.

¹⁴ C'alal laj yac' jatovuc batel ajvaliletic li Boch'o ech'em svu'ele, sacuben no'ox batel yu'unic li vits Salmone, co'ol jech chac c'u cha'al chyal tayo ti sacuben no'oxe.

¹⁵ Lec muc' li vits te ta Basane; lec toyol li vitsetic tee.

¹⁶ Vo'oxuc li toyol vitsoxuque, ¿c'u yu'un ti it'ix avo'ntonic yu'un li vits ti bu tsc'an chnaqui li Diose? Pero li Muc'ul Diose ja' ono'ox te chnaqui o sbatel osil.

¹⁷ Li Diose ta millón no'ox oy yu'un li caretaetic sventa pleitoe; li Cajvaltique te chtal ta Sinaí yo' bu oy li xch'ulnae.

¹⁸ Dios, lamuy batel ta toyol, laj achuc batel li boch'otic laj atsale, laj avich' li amoton yu'un cristianoetique; c'alal ta jtoybaetic, laj yac' sbaic ta atojol, Muc'ul Dios.

¹⁹ Ac'o ich'atuc ta muc' li Cajvaltic Diose, ja' li Dios cu'untique, ja' li Jcoltavanej cu'untique, yu'un ta jujun c'ac'al ja' chixcuchbutic li quicatstique.

²⁰ Li Dios cu'untique ja' no'ox jun Dios ti chcoltavane, xchi'uc ja' xu' yu'un chiscoltautic ta sventa lajel.

²¹ Li Diose ta xvoch'be sjol li yajcontrae, ja' sjol li boch'otic te tspasic o c'usitic chopole.

²² Li Cajvaltique jech yaloj: “Ta xcac' sutan yan velta ta Basán; ta xcac' sutan yan velta ta natil nab,

²³ yu'un ac'o bat amuc avacan ta xch'ich'al li avajcontrae, xchi'uc ac'o bat sleq'uic li ats'i'taque”, xi.

²⁴ Dios, vo'ot li Diosot cu'une, vo'ot li Ajvalilot cu'une, chvinaj xa xcholoj sbaic te ta ach'ulna li boch'o chayich'icot ta muq'ue.

²⁵ Li jq'uejimoletique ja' ba'yucbe chbatic; li jtijsonetique ja' ts'acalpat chbatic; ja' te cacalic batel ta o'lol li tsebetic tstijic batel chac'chac' taq'uinetique.

²⁶ Acotolic ich'ic ta muc' li Diose, vo'oxuc li sts'unubaloxuc Israele; tsobo aba acotolic ta yalbel slequilal li Cajvaltique.

²⁷ Ja' ba'yucbe chbat avu'unic li smomnich'nab Benjamine, ja' li c'ox its'inale; ja'o te chtalic ec li banquilaletic yu'un Judae; ja'o te chtalic ep li banquilaletic yu'un Zabulón xchi'uc li banquilaletic yu'un Neftalie.

²⁸ Dios cu'un, laj xa avac' ta ilel li avu'ele; ac'o xa ta ilel yan velta li avu'el ti laj ono'ox apas ta jtojolcutique.

²⁹ Jech xu' chtal yac'boxuc amoton li ajvaliletic te ta ach'ulna ta Jerusalene.

³⁰ Soqueso li Egipto ti xco'laj xchi'uc chonbolom ta ajtique; ti xco'laj xchi'uc epal simarón tot vacaxetique ti xco'laj xchi'uc ch'ium tot vacaxetique. Ta sventa ti toj jc'ulejique, mu'yuc stu chilic li cristianoetique. Puco batel li cristianoetic ti toj c'upil cha'yic paspleitoe.

³¹ Ta to xlic talicuc li banquilaletic ta Egiptoe; li etiopiaetique ta to xlic stoy sc'obic ta stojol Dios.

³² Ajvaliletic, cristianoetic ta banamil, q'uejinanic yu'un li Diose; q'uejinanic yu'un li Cajvaltique,

³³ ja' li boch'o cajal ta sba yac'ol vinajele, ja' li vinajel ti te oy o ta vo'onee. A'yo ava'yic, toj ech'em svu'el li sc'ope.

³⁴ Q'uelo lec avilic c'u x'elan stsatsal li Diose. Li smuc'ul stsatsale te oy ta stojol li Israele; li svu'ele xc'ot c'alal to ta yaxal vinajel.

³⁵ Li Diose xi'bil, ich'bil ta muc' te ta xch'ulna; li Dios yu'un Israele chac'be stsatsal spersaic li steclumale. Ich'biluc ta muc' li Diose.