Salmos 67 - Bible in Tzotzil de Chenalhó with Deuterocanon

Ac'o ich'atuc ta muc' stuc li Diose

Q'ueoj. Ja' laj yich' q'uejintael ta sonetic ti oy yaq'uile; ja' la sventain li banquilal yu'un jq'ueojetique.

¹ Dios cu'un, c'uxubinuncutic me, ac'buncutic bendición; ac'o xojobanuc tal asat ta jtojolcutic,

² yu'un jech ac'o yilic c'u x'elan slequil avo'nton; ac'o yilic scotol cristianoetic ta banamil c'u x'elan chacoltavan.

³ Dios cu'un, ac'o yalic alequilal scotol li cristianoetic ta jujun lume; ac'o yich'icot ta muc' scotolic.

⁴ Ac'o cuxetuc no'ox yo'ntonic; ac'o la'eticuc no'ox li cristianoetic ta jujun banamile, yu'un tuc' chachapan scotol li cristianoetique, xchi'uc vo'ot achabioj scotol li jujun banamile.

⁵ Dios cu'un, ac'o yalic alequilal scotol li cristianoetic ta jujun lume; ac'o yich'icot ta muc' scotolic.

⁶ Isatin xa li c'usitic ts'unbil ta banamile; li Dios cu'untique laj xa yac'butic bendición.

⁷ Ac'o yac'butic to ep bendición li Diose. Ac'o yich'ic ta muc' Dios scotol li cristianoetic ta banamile.