Salmos 65 - Bible in Tzotzil de Chenalhó with Deuterocanon

Ja' no'ox stuc ich'bil ta muc' li Diose

Q'ueoj yu'un David; ja' la sventain li banquilal yu'un jq'ueojetique.

¹ Dios cu'un, vo'ot no'ox atuc ich'bilot ta muc' te ta Sión; vo'ot no'ox atuc ti tsc'an mu stselbuj jc'opcutic ta atojole.

² Vo'ot chava'ibun li jc'opcutique; vo'ot no'ox xu' chtal ta atojol scotol li cristianoetique.

³ Li c'usitic chopole tsc'an chistsalun, pero vo'ot no'ox chapasbuncutic perdón ti bu chijelovcutic ta atojole.

⁴ Toj xcuxet no'ox yo'ntonic li boch'o chat'uj, ti chavic' ta atojole, yu'un jech xu' te chtal nacluc ta yamaq'uil ana. Lec noj jch'utcutic o ta sventa li c'usitic lec te oy ta anae, ja' li ch'ulna avu'une.

⁵ Dios cu'un, vo'ot jcoltavanejot cu'uncutic, c'alal chatac'bun jc'opcutique, lec tsotsic senyail chavac' ta ilel. Sbejel banamil tspat yo'ntonic ta atojol, xchi'uc c'alal to ta namal muc'tiquil nab.

⁶ Vo'ot aventainoj lec ta avu'el ta atsatsal li muc'tiquil vits ti jech lec oye.

⁷ Vo'ot chapajes ti c'alal chlic ta vo'etel, ti c'alal chlic ta yuc'lajetel li nabetique, xchi'uc vo'ot chapajes ti c'alal xvochlajetic no'ox li cristianoetique.

⁸ Ja' yu'un li jnaclumetic ta sbejel banamile chlic xi'icuc yu'un li muc'tic senyailtac chapase, xchi'uc vo'ot no'ox chavac' ti xcuxet yo'nton scotol li cristianoetic ta sloq'ueb c'ac'al xchi'uc ta smaleb c'ac'ale.

⁹ Vo'ot achabioj li banamile; vo'ot chavac'be tal ya'lel; vo'ot chats'ites scotol li c'usitic chch'ie, yu'un ja' chavat'es o ta uc'um ti noj ya'lele; chavac' satinuc lec li c'usitic ch'iemique, jech lec chapal avu'un scotol.

¹⁰ Vo'ot chavat'es lec ta jujuchol li banamile; chanojesbe lec ta vo' li sbevo'altaque; chac'unibtas lec ta vo' li banamile; chavac'be lec bendición li c'usitic te ch'iemique.

¹¹ Chanojes lec ta abendición li jujun jabile; li toquetic avu'une bats'i ep tscocanic tal ya'lelic,

¹² jech lec yoxic li ts'i'laletic ta xocol banamile, jech lec xcuxet yo'ntonic li vitsetique.

¹³ Jech chlic nojuc ta chijetic li stenlejaltique, chlic nojuc ta trigoaltic li yaxalaltique; scotolic ch-avanic, xla'etic no'ox yu'un toj xcuxet yo'ntonic.