Salmos 64 - Bible in Tzotzil de Chenalhó with Deuterocanon

C'alal contrainbil li Davide la sc'an coltael yu'un Dios

Q'ueoj yu'un David; ja' la sventain li banquilal yu'un jq'ueojetique.

¹ Dios cu'un, a'ibun me li jc'op ti li' chi'avan ta atojole; chabiun me, mu me xismilicun li cajcontra ti toj xi'bal sbaique.

² Nac'un me, jech mu xc'ot ta pasel li c'usi xchapanojic ta mucule, xchi'uc li c'usi snopoj tsc'an chispasbicun li chopol cristianoetique.

³ Xjuxojbeic xa lec yeilal jech chac c'u cha'al espada; tst'ilesic xa tal ta jtojol flechaetic ya'yel, yu'un toj ep li c'usi chopol chalic ti oy svenenoal ya'yele.

⁴ Te ta snac'ubbailic chlic yac'beic tal flecha li boch'o mu'yuc smule; ta mucul ta st'ilesbeic tal, me jutuc mu'yuc xi'el cha'yic.

⁵ Stsatsubtasoj yo'ntonic ta spasel li c'usi chopole; chchapanic c'u x'elan xu' chyacvanic ta mucul. Jech chalic: “Mu'yuc boch'o chijyilutic”, xiic.

⁶ Tsnopic ti mu'yuc boch'o tsq'uel li c'usi chopol tspasique, pero li boch'o xotquin c'usi tsnop ta yut yo'nton cristianoetique ta ono'ox sq'uel c'u x'elan li smulique.

⁷ Ta x'ac'batic tal flechaetic yu'un Dios ec; ta mucul ch-ac'batic tal, jech ch'ayel yo'nton chtaatic ec.

⁸ Ta sc'op no'ox stuquic chyalic ta lum, jech ta xna'leatic yu'un scotol li boch'otic chilique.

⁹ Jech scotol cristianoetic chlic yich'ic ta muc' li Diose; chlic yalic ti toj lec yabtele; chlic c'otuc ta yo'ntonic ti toj lec c'usitic spasoje.

¹⁰ Toj xcuxet no'ox yo'ntonic, xpatet no'ox yo'ntonic ta stojol Muc'ul Dios li boch'otic lec yo'ntonique, toj jun no'ox yo'nton li boch'otic tuc' yo'ntonique.