Salmos 63 - Bible in Tzotzil de Chenalhó with Deuterocanon

Ja' no'ox xu' chismuq'uibtasbutic co'ntontic li Diose

Q'ueoj yu'un David; ja'o ti c'alal stuc te oy ta xocol banamil ta Judae.

¹ Dios, vo'ot no'ox Diosot cu'un, tsots ac'oplal ta sa'el cu'un; taquin co'nton ta asa'el chca'ay; chajc'anot ta scotol jbec'tal. Ja' jechun jech chac c'u cha'al banamil ti taquin xae, ti mu xa c'usi chcuxi ta scoj ti mu'yuc ya'lele.

² Yu'un ta jc'an ta jq'uel avu'el xchi'uc avutsilal, jech chac c'u cha'al laj to'ox jq'uelot te ta ach'ulnae.

³ Yu'un ja' toj tsots sc'oplal li c'uxubinel avu'une; ja' jutuc sc'oplal li jcuxlejale. Ta xaquich'ot ta muc' jchi'uc li quee;

⁴ ta xcal o alequilal ti c'alal cuxulun toe; ta jtoy jc'ob ta atojol ti c'alal chajc'opanote.

⁵ Jech toj jun no'ox co'nton chicom jech chac c'u cha'al boch'o cha'ibe smuil ve'lil ta jun q'uin ti toj mue; toj xcuxet no'ox co'nton chaquich'ot ta muc' jchi'uc li quee.

⁶ C'alal mocholun xa ta jvayabe te chajna'ot; sbejel ac'ubal ta jnopilan c'u x'elan avo'nton.

⁷ Yu'un vo'ot laj acoltaun; toj xcuxet no'ox co'nton, yu'un amacojun ta yolon axic' ya'yel.

⁸ Vo'ot no'ox te nabalun o ta atojol, yu'un vo'ot atsacojun ta abats'ic'ob.

⁹ Li boch'otic tsc'an chismilicune, ja' chbatic ta ch'en stuquic.

¹⁰ Milbil ta xchamic ta espada, jech ta xti'atic ta jti'vanej bolom.

¹¹ Yan li ajvalile toj xcuxet no'ox yo'nton ta atojol. Ich'bil ta muc' chc'otic li boch'otic chalic ta jamal ti chayich'icot ta muq'ue; yan li j'epalc'opetique macal chc'ot yeic.