Salmos 62 - Bible in Tzotzil de Chenalhó with Deuterocanon

Li Diose ja' no'ox stuc jchabivanej cu'untic

Q'ueoj yu'un David. Ja' la sventain li Jedutún; ja' li banquilal yu'un jq'ueojetique.

¹ Ja' no'ox ta sventa Dios ti jun no'ox co'ntone, yu'un ja' te chlic tal ta stojol li jcoltaele.

² Ja' no'ox stuc chisnac'un jech chac c'u cha'al muc'ta ton, ja' no'ox stuc chiscoltaun; ja' no'ox jnac'ubbail c'otem; mu'yuc c'usi ora xu' chiyal ta lum.

³ ¿Baq'uin to chlaj avo'ntonic ta snopel li c'usi chachapanic ta jtojole? Acotolic chanop chapech'icun ta teq'uel; chac'an chajinesicun o jech chac c'u cha'al pac'benal na ti chjin xae.

⁴ Ja' no'ox chac'an chabic'tajesbicun jc'oplal; ja' no'ox lec chava'yic li epalc'ope. Ta aveique lec xa avich'ojicun ta muc' yilel, pero ta avo'ntonique chopol chavilicun.

⁵ Ja' no'ox ta sventa Dios ti jun no'ox co'ntone, yu'un ja' no'ox jpatoj o co'nton yu'un.

⁶ Ja' no'ox chisnac'un jech chac c'u cha'al muc'ta ton, ja' jcoltavanej cu'un; ja' jnac'ubbail c'otem, jech mu xiyal ta lum.

⁷ Ja' no'ox ta sventa Dios ta jta coltael, xchi'uc ja' no'ox Dios chac' ti lec chi'albat jc'oplale; ja' jmacubbail c'otem li Diose, xchi'uc ja' jnac'ubbail c'otem.

⁸ Acotolic jchi'iltac, ja' no'ox pato avo'ntonic scotol c'ac'al ta stojol li Diose; albeic ta jamal scotol c'usi oy ta avo'ntonic ti c'alal chac'opanique, yu'un ja' jpojubbailtic li Diose.

⁹ Li cristianoetic ta banamile solel mu'yuc stuic o, ja' no'ox jechic jech chac c'u cha'al yic'al quetic; puru epalc'op no'ox oy ta yo'ntonic. C'alal jmojuc chich'ic bisel ta kilo scotolique, solel mu'yuc ol chc'otic; ja' ol to jutuc chcom li yic'al quetique.

¹⁰ Mu me xapat avo'ntonic ti xu' avu'un cha'uts'intavanique; mu me xanop ti te chapasic o ta jc'ulej ta sventa eleq'ue. Me oy chc'ot ta pasel chapasic ta jc'uleje, mu me ja'uc te xbat avo'ntonic o.

¹¹ Oy ic'opoj jun velta li Diose; chib velta laj ca'ay laj yal ti ja' no'ox stuc oy svu'ele,

¹² xchi'uc ti ja' no'ox stuc jc'uxubinvaneje, xchi'uc ti ja' chac'be stojol jujun cristianoetic ti c'u x'elan la spasique.