Salmos 61 - Bible in Tzotzil de Chenalhó with Deuterocanon

Ja' stsatsal co'ntontic li Diose yu'un ja' chiscoltautic

Q'ueoj yu'un David. Laj yich' q'uejintael ta sonetic ti oy yaq'uiltaque; ja' la sventain li banquilal yu'un jq'ueojetique.

¹ Dios cu'un, a'ibun li jc'ope; a'ibun li coq'uel cavanel ta atojole,

² Chi'avan ta atojol c'alal to ta sti'il banamil, yu'un chca'ay ti chlaj xa stsatsal co'ntone. Ic'un muyel ta toyol ch'entic yo' xu' chicol toe,

³ yu'un vo'ot jnac'ubbail c'otemot. Ja' jech c'otemot cu'un jech chac c'u cha'al toyol q'uelub osil ti lec tsotse, yu'un vo'ot chacoltaun ta sventa li cajcontrae.

⁴ Ta jc'an te chinaqui o ta ch'ulna avu'un sbatel osil, jech lec nac'alun o ta yolon axic' chic'ot.

⁵ Li vo'ote, Dios cu'un, laj ava'ibun li c'usitic laj cal ta atojole; laj xa avoc'bun li jpuculalcutic jchi'uc li boch'otic yich'ojicot ta muq'ue.

⁶ Natubtasbo me yorail li ajvalile; jal ac'o cuxiuc, ep jabil ac'o ch'iuc.

⁷ Te ac'o oyuc o ta atojol sbatel osil vo'ot li Diosote; chabio ta sventa yutsil avo'nton, xchi'uc ta sventa ti lec ac'anoje.

⁸ Jech xu' ta xcal alequilal scotol c'ac'al; ja' jech ta jtoj o ta jujun c'ac'al li c'usi caloj ta atojole.