Salmos 60 - Bible in Tzotzil de Chenalhó with Deuterocanon

Sc'anel coltael ta stojol Dios

Q'ueoj yu'un David. “Nichim”, xi sbi snuq'uilal laj yac'be; ja' la sventain li banquilal yu'un jq'ueojetique. Ja' sventa chanubtasel. Ja' chal ti c'alal la spasic pleito xchi'uc li Aram-Naharaime xchi'uc li Aram ta Sobae. C'alal isut batel li Joabe, c'ot stsal noxtoc li Edome. Lajunmil (10,000) viniquetic la smil comel te ta stenlejaltic Ats'am.

¹ Dios cu'un, laj xa abajuncutic, laj xa acomtsanuncutic; la'ilin xa ta jtojolcutic. La' me, sutan tal yan velta ta jtojolcutic.

² Laj avac' nicuc li banamile, xchi'uc laj avac' javuc ya'yel; ac'o snu'p sba yan velta, yu'un ta xa xjem yalel scotol.

³ Laj xa avac'be tsatsal preva li ateclumale; laj avac' cuch'cutic pasem ya'lel ts'usub ya'yel ti chvovij jolcutic yu'une.

⁴ Li boch'o chayich'icot ta muq'ue, ac'bo sbanderaic; ac'o stoyic muyel ta sventa ti melel vo'ot chacoltavane.

⁵ Coltao me li boch'otic lec ac'anoje; coltao ta sventa atsatsal avu'el. A'ibun me li jc'ope, Dios cu'un.

⁶ Li Diose jech yaloj te ta xch'ulna: “Toj xcuxet no'ox co'nton ta jvoq'uilan li Siqueme; te ta xcaq'uic batel ta stenlejaltic Sucot.

⁷ Li Galaad xchi'uc Manasese ja' cu'untac; li Efraine ja' taq'uin sventa smac jol c'otem; li Judae ja' jvaston c'otem sventa ta jpas mantal.

⁸ Yan li Moabe ja' pocobc'obal c'otem cu'un; li Edome ta jten batel ta jxonob; chi'avan ta sventa ti tsalbil chc'ot cu'un li filistaetique”, xi.

⁹ ¿Boch'o xu' chiyic'un batel te ta lum ti setbil lec ta tsatsal coraltone? ¿Boch'o xu' chiyic'un batel c'alal to ta Edome?

¹⁰ Yu'un li vo'ote, Dios cu'un, laj xa abajuncutic; mu'yuc xa chloc' achi'inbuncutic ta pleito li cajsoldadocutique.

¹¹ Coltauncutic xa ta stsalel li cajcontracutique, yu'un li coltael chac' cristianoetique mu'yuc stu.

¹² Ja' no'ox ta sventa Dios xu' ta jpastic li c'usi tsotsique, yu'un ja' chixpech'butic ta teq'uel li cajcontratique.